मजुरास ठार करून मृतदेहाजवळच बसून होता वाघ…!

चंद्रपूर :-वाघाचे हल्ले मोठ्या प्रमाणावर वाढू लागले आहेत.हल्ल्यांमुळे शेतकरी तथा नागरिक भयभीत होऊन शेतावर जाण्यासाठी तसेच शेतीची कामे करण्यासाठी घाबरत आहेत.अशातच काल,मंगळवारी १४ जानेवारीच्या सकाळी १० वाजताच्या सुमारास

वाघाच्या हल्ल्यात मजूर ठार झाल्याची घटना चंद्रपूर जिल्ह्याच्या बल्हारशाह वनपरिक्षेत्रात घडली. लालसिंग बरेलाल मडावी वय ५७ वर्षे रा.मणिकपूर माल (बेहराटोला) ता. बिछाया जि.मंडला राज्य मध्यप्रदेश असे मृताचे नाव आहे.

सदर घटनेची माहिती मिळताच सहाय्यक वनसंरक्षक मध्य चांदा वनविभाग चंद्रपूर व वनपरिक्षेत्र अधिकारी बल्हारशाह आपल्या अधिनस्त वनकर्मचाऱ्यांसह तात्काळ घटनास्थळी दाखल झाले.तेव्हा वाघ हा मृतदेहाजवळच बसून होता.वाघाला हुसकावून लावण्याचा प्रयत्न केला असता वाघाने वनकर्मचाऱ्यांच्या दिशेने धूम ठोकली.दुपारी ४ वाजताच्या सुमारास अति शिघ्र दलाला पाचारण करण्यात आले.पशुवैद्यकीय अधिकारी वन्यजीव उपचार केंद्र ताडोबा अंधारी व्याघ्र प्रकल्प चंद्रपुर यांचे मार्गदर्शनात शुटर अविनाश फुलझेले यांनी वाघाला डॉट मारुन वाघाला बेशुध्द केले.त्यानंतर मृतदेह ताब्यात घेऊन पोलिस कर्मचाऱ्यांच्या समक्ष मोका पंचनामा करण्यात आला.तसेच मृत व्यक्तीचे नातेवाईकास सानृग्रह आर्थिक मदत देण्यात आली. ही कारवाई पोलिस निरीक्षक सुनील गाडे,क्षेत्र सहाययक के.एन.घुगलोत,व्हि.पी.रामटेके,वनरक्षक सुधीर बोकडे, अनिल चौधरी,धर्मेंद्र मेश्राम,तानाजी कामले,वर्षा पिपरे, उषा घोडवे,वैशाली जेनेकर,माया पवार,पुजा टोंगे आदी कर्मचाऱ्यांनी केली.