पंतप्रधानांच्या हस्ते ‘पीएम किसान’च्या २४ व्या हप्त्याचे वितरण; पात्र शेतकरी कुटुंबांच्या खात्यात प्रत्येकी दोन हजार रुपये होणार जमा..

गडचिरोली :-प्रधानमंत्री किसान सन्मान निधी अर्थात ‘पीएम किसान’ योजनेच्या २४ व्या हप्त्याचे वितरण येत्या,शुक्रवार ३० ऑक्टोंबर २०२६ रोजी देशाचे पंतप्रधान नरेंद्र मोदी यांच्या हस्ते करण्यात येणार आहे. गुजरातमधील बनासकांठा येथून एका क्लिकद्वारे पात्र लाभार्थी शेतकरी कुटुंबांच्या आधार-संलग्न बँक खात्यांमध्ये प्रत्येकी दोन हजार रुपयांचा निधी थेट जमा करण्यात येणार आहे,

भारत सरकारच्या प्रधानमंत्री किसान सन्मान निधी योजनेअंतर्गत पात्र शेतकरी कुटुंबांना आर्थिक सहाय्य दिले जाते.या योजनेच्या २४ व्या हप्त्याच्या वितरण सोहळ्यात गडचिरोली जिल्ह्यातील शेतकऱ्यांना सहभागी होता यावे,यासाठी विविध स्तरांवर विशेष कार्यक्रमांचे आयोजन करण्यात आले आहे.या माध्यमातून शेतकऱ्यांना निधी वितरण सोहळ्याच्या थेट प्रक्षेपणाशी जोडले जाणार आहे.

जिल्ह्यातील कृषी विज्ञान केंद्र,कृषी उत्पन्न बाजार समिती,विविध शासकीय कार्यालये आणि संशोधन केंद्रांमध्ये या सोहळ्यानिमित्त कार्यक्रम आयोजित करण्यात आले आहेत.यासोबतच शेतकरी उत्पादक कंपन्या व संघटना(एफपीसी/एफपीओ)आणि सहकारी पतसंस्था(पॅक्स)येथेही कार्यक्रमांचे आयोजन करण्यात आले आहे.जिल्हा,तालुका तसेच ग्रामपंचायत स्तरावर होणाऱ्या या कार्यक्रमांमुळे शेतकऱ्यांना स्थानिक पातळीवर वितरण सोहळ्यात सहभागी होण्याची संधी मिळणार आहे.

स्थानिक कृषी व महसूल विभागाच्या अधिकाऱ्यांच्या उपस्थितीत हा कार्यक्रम पार पडणार आहे.जिल्ह्यातील अधिकाधिक शेतकऱ्यांचा सहभाग नोंदविण्याच्या दृष्टीने विविध संस्था आणि स्थानिक स्तरांवरील कार्यक्रमांच्या माध्यमातून सोहळ्याचे थेट प्रक्षेपण उपलब्ध करून देण्यात येणार आहे.

शेतकऱ्यांना ऑनलाइन पद्धतीनेही या वितरण सोहळ्यात सहभागी होता येणार आहे.त्यासाठी “https://pmindiawebcast.nic.in” (https://pmindiawebcast.nic.in)या संकेतस्थळावर थेट प्रक्षेपण पाहता येईल.