अवकाळी पावसाने बळीराजा संकटात; नुकसानीचे पंचनामे करून भरपाई द्यावी.. -ओबीसी काँग्रेसचे प्रदेश सरचिटणीस मनोज ढोरे

देसाईगंज(गडचिरोली):-अवकाळी पावसाने देसाईगंज तालुक्यातील शेतकरी बांधवांच्या धानपिकाचे मोठ्या प्रमाणात नुकसान झाले असून बळीराजा संकटात सापडला आहे.अवकाळी पावसामुळे शेतकरी हवालदिल झाला आहे.ऐन कापणीच्या हंगामात झालेल्या मुसळधार पावसामुळे शेतात कापून ठेवलेल्या धान पिकाला कोंब फुटण्यास सुरुवात झाली आहे.त्यामुळे शेतकऱ्यांचे मोठे आर्थिक नुकसान होण्याची भीती निर्माण झाली आहे. मागील काही दिवसांपासून हवामानातील सातत्याने होणाऱ्या बदलांमुळे परतीचा पाऊस धुमाकूळ घालत आहे.याचा सर्वाधिक फटका धान उत्पादक शेतकऱ्यांना बसला आहे.अनेकांनी कापलेले धान सुकवण्यासाठी शेतात ठेवले होते,काही ठिकाणी कापणीचे काम सुरू होते; मात्र,अचानक झालेल्या मुसळधार पावसाने हे सर्व धान भिजून गेले.शेतकऱ्यांनी कष्टाने पिकवलेले धान आता मातीमोल होत असल्याने नुकसानग्रस्त शेतकऱ्यांच्या नुकसानीचे पंचनामे करून भरपाई द्यावी; अशी मागणी ओबीसी काँग्रेसचे प्रदेश सरचिटणीस मनोज ढोरे यांनी केली आहे.