कोणताही पात्र बांधकाम कामगार योजनांपासून वंचित राहू नये.. -प्रत्येक ग्रामपंचायत व पंचायत समिती स्तरावर विशेष जनजागृती मोहीम राबवा- आमदार रामदास मसराम

देसाईगंज(गडचिरोली):-महाराष्ट्र इमारत व इतर बांधकाम कामगार कल्याणकारी मंडळ,मुंबई अंतर्गत जिल्हा कामगार सुविधा केंद्र,गडचिरोली यांच्या वतीने आज,सोमवार २० जुलै रोजी देसाईगंज पंचायत समिती येथे गटविकास अधिकारी यांच्या दालनात बांधकाम कामगार मंडळामार्फत राबविण्यात योजना,तसेच लाभार्थी नोंदणी संदर्भात आरमोरी विधानसभा क्षेत्राचे आमदार रामदास मसराम यांच्या उपस्थितीत आढावा बैठक पार पडली.

बैठकीत आमदार मसराम यांनी बांधकाम क्षेत्रातील पात्र कामगारांची १०० टक्के नोंदणी करून त्यांना शासनाच्या विविध कल्याणकारी योजनांचा लाभ मिळवून देण्यासाठी विशेष मोहीम राबविण्याच्या सूचना दिल्या. बांधकाम क्षेत्रात किमान ९० दिवस काम केलेल्या प्रत्येक पात्र कामगारांची ऑनलाइन नोंदणी करून त्यांना शिक्षण,आरोग्य,प्रसूती सहाय्य,सुरक्षा साहित्य,घरकुल, मुलांच्या शिक्षणासाठी आर्थिक सहाय्य,विवाह सहाय्य, पेन्शन,अपघात विमा तसेच मंडळामार्फत राबविण्यात येणाऱ्या इतर सर्व योजनांचा लाभ मिळेल,यासाठी संबंधित अधिकाऱ्यांनी विशेष प्रयत्न करावेत,असे त्यांनी सांगितले.

यावेळी दगड फोडणे व कापणे,लादी-टाईल्स कापणे व पॉलिश करणे,सुतारकाम,रंगकाम,गटार व नळजोडणी, विद्युत वायरिंग,अग्निशमन व वातानुकूलित यंत्रणा बसविणे,लिफ्ट व स्वयंचलित जिने,सुरक्षा दरवाजे, लोखंडी ग्रिल,जलसंचयन संरचना,अंतर्गत सजावटीची कामे,काचकाम,सौर उपकरणे,मॉड्युलर किचन,सिमेंट काँक्रिट वस्तू,जलतरण तलाव,सार्वजनिक उद्याने,पदपथ, बसथांबे,रोटरी,कारंजे तसेच इमारत व पायाभूत सुविधांशी संबंधित विविध कामांमध्ये कार्यरत असलेले कामगार मंडळाच्या योजनांसाठी पात्र असल्याचे त्यांनी स्पष्ट केले.

प्रसंगी आमदार मसराम यांनी शासकीय बांधकाम अधिकारी कुलदीप भोलाने यांना जिल्ह्यातील प्रत्येक ग्रामपंचायत व पंचायत समिती स्तरावर विशेष जनजागृती करून कामगारांपर्यंत योजनांची माहिती पोहोचवावी.नोंदणी प्रक्रियेत येणाऱ्या अडचणी तात्काळ दूर करून पात्र कामगारांना शासनाच्या सर्व कल्याणकारी योजनांचा लाभ मिळवून द्यावा.कोणताही पात्र बांधकाम कामगार योजनांपासून वंचित राहणार नाही,याची संबंधित यंत्रणांनी विशेष दक्षता घ्यावी,असेही त्यांनी स्पष्ट केले.

बैठकीस देसाईगंज पंचायत समितीचे गटविकास अधिकारी रविंद्र भाबड,कोरचीचे गटविकास अधिकारी  राजेश फाये,कुरखेडाचे गटविकास अधिकारी धीरज पाटील,आरमोरीचे गटविकास अधिकारी मंगेश आरेवार, सरकारी बांधकाम विभागाचे लिपिक कांबळे,परशुराम ठाकरे,तसेच महाराष्ट्र इमारत व इतर बांधकाम कामगार कल्याणकारी मंडळाच्या वतीने देसाईगंज,आरमोरी, कुरखेडा व कोरची तालुक्यांचे प्रभारी अधिकारी उपस्थित होते.बैठकीत बांधकाम कामगारांच्या नोंदणीचा आढावा घेऊन विविध कल्याणकारी योजनांची प्रभावी अंमलबजावणी करण्याबाबत सविस्तर चर्चा करण्यात आली.