अज्ञात चोरट्यांचा सोने-चांदीच्या दुकानात डल्ला.. – आरमोरी शहरातील घटना..

आरमोरी(गडचिरोली):-गडचिरोली जिल्ह्याच्या आरमोरी शहरात अज्ञात चोरट्यांनी जणूकाही धुमाकूळ घातल्याचे चित्र आहे.अवघ्या दोन महिन्यांपूर्वी म्हणजेच नोव्हेंबर-२०२५ मध्ये एका अज्ञात चोरट्या महिलेने गर्दीचा फायदा घेत नवीन बसस्थानकावर दोन महिलांच्या पर्स मधून तब्बल ८ लाख ६४ हजार ५०० रुपयांचे दागिने लंपास केल्याची घटना उघडकीस आली होती.अश्यातच आज,शनिवार १७ जानेवारी रोजी अज्ञात चोरट्यांनी आरमोरी शहराच्या सुभाष चौक परिसरातील सोने-चांदीच्या दुकानात डल्ला मारून तब्बल ७० हजार ५०० रुपये किंमतीच्या चांदीच्या दागिन्यांचा ऐवज लंपास केल्याची घटना उघडकीस आल्याने शहरात एकच खळबळ उडाली आहे.विशेष म्हणजे,चोरट्यांनी एका ठिकाणची चोरी केल्यानंतर जवळच असलेले दुसरेही दुकान फोडण्याचा प्रयत्न केला,पण तो निष्फळ ठरला.

याबाबत अधिक माहिती अशी की,आरमोरी शहराच्या  सुभाष चौक या ठिकाणी ‘लक्ष्मीनारायण ज्वेलर्स’ नामक सोने-चांदीचे दुकान आहे.दुकानाच्या  संचालकांनी काल शुक्रवारच्या रात्री दुकान बंद केले होते.अश्यातच आज शनिवार सकाळच्या सुमारास दुकानाचे शटर उघडे दिसले.आतमध्ये पाहतात तो काय,अज्ञात चोरट्यांनी दुकानातील जुनी वापरती चांदीची मोड चोरी करून चांदीची चोरडी,लहान मुलांचे कडे,वाळे,कटली,असे एकूण ४७० ग्रॅम चांदीचे दागिने चोरी करण्यात आल्याचे उघड झाले.दरम्यान, अज्ञात चोरट्यांनी जवळच असलेल्या हर्ष ज्वेलर्स दुकानाचेही शटर तोडण्याचा प्रयत्न केला,पण दुकानाला चॅनल गेट असल्याने चोरट्यांनी चोरीला पूर्णविराम दिला.प्रकरणी अज्ञात चोरट्यांविरुद्ध आरमोरी पोलीस ठाण्यात भारतीय न्याय संहिता २०२३ चे कलम ३३१(४),३०५ अन्वये गुन्हा दाखल करण्यात आला आहे.प्रकरणाचा पुढील तपास ठाणेदार कैलास गवते यांच्या मार्गदर्शनाखाली पीएसआय नरेश सहारे करीत आहेत.