इसमाची गळफास घेऊन आत्महत्या; आरमोरी शहरातील घटना..

आरमोरी(गडचिरोली):-गडचिरोली जिल्ह्याच्या आरमोरी शहरात एका ६५ वर्षीय इसमाने गळफास घेऊन आत्महत्या केल्याची खळबळजनक घटना आज, रविवार २८ जून रोजी सकाळच्या सुमारास उघडकीस आली.मनोहर किसन नंदनवार वय ६५ वर्षे असे गळफास घेऊन आत्महत्या केलेल्या इसमाचे नाव असून ते आरमोरी शहराच्या आदिवासी मुलांचे वसतिगृह नजिक वास्तव्यास होते.

मनोहर नंदनवार हे आज सकाळच्या सुमारास आरमोरी तहसील कार्यालय परिसराच्या मागील बाजूस असलेल्या एका झाडाला दोरीच्या सहाय्याने गळफास घेतलेल्या अवस्थेत काही नागरिकांना दिसून आले.प्रकरणी नागरिकांनी घटनेची माहिती आरमोरी पोलिसांना दिली. घटनेची माहिती मिळताच पोलिसांचे पथक घटनास्थळी दाखल होत घटनेचा पंचनामा करून मृतदेह उत्तरीय तपासणीसाठी आरमोरी उपजिल्हा रुग्णालयात पाठवला.नंदनवार यांनी आत्महत्येसारखे टोकाचे पाऊल उचलण्यामागचे कारण अद्याप स्पष्ट झाले नसून याबाबत अधिकचा तपास आरमोरी पोलिसांकडून सुरू करण्यात आला आहे.