आजची दुःखद घटना..! २६ वर्षीय तरुणाचा वैनगंगा नदीत बुडून मृत्यू..

आरमोरी(गडचिरोली):-नदी घाटावर आंघोळीसाठी गेलेल्या एका २६ वर्षीय तरुणाचा वैनगंगा नदीत बुडून मृत्यू झाल्याची दुःखद घटना आज,मंगळवार ३ मार्च रोजी दुपारी १२ वाजेच्या सुमारास आरमोरी- गांगलवाडी टी-पॉईंट जवळील वैनगंगा नदी घाटावर घडली.शुभम रामटेके वय २६ वर्षे,रा.गायकवाड चौक,आरमोरी, जि.गडचिरोली असे मृत पावलेल्या तरुणाचे नाव आहे.

आज सर्वत्र मोठ्या उत्साहात रंगपंचमीचा उत्सव साजरा करण्यात आला.सकाळच्या सुमारास लहानांपासून ते थोरांपर्यंत सर्वांनी रंग खेळून आनंद द्विगुणित केला. अश्याच प्रकारे शुभम रामटेके हा  रंगपंचमी साजरी केल्यानंतर काही मित्रांसोबत आरमोरी शहरापासून काही अंतरावर असलेल्या गांगलवाडी टी-पॉईंट जवळील वैनगंगा नदी घाटावर आंघोळीसाठी गेला होता.आंघोळ करत असतांनाच शुभम हा खोल पाण्यात गेला.पाण्याचा अंदाज न आल्याने तो गटांगळ्या खाऊ लागला.लागलीच मित्रांनी आरडाओरड केली.पण,तोपर्यंत खूप उशीर झाला होता आणि शुभमचा पाण्यात बुडून मृत्यू झाला. घटनेची माहिती आरमोरी पोलिसांना मिळताच आरमोरी पोलिसांनी घटनास्थळ गाठून मृतदेह पाण्यातून बाहेर काढून उत्तरीय तपासणीसाठी रुग्णालयात पाठवला. पुढील तपास आरमोरी पोलीस प्रशासन करीत आहे.ऐन उत्सवाच्या दिवशीच दुःखद घटना घडल्याने रामटेके कुटुंबियांवर मोठा आघात होऊन शहरात हळहळ व्यक्त केली जात आहे.