आरमोरी-रवी मार्गावरील जंगल परिसरात आढळला कुजलेला मृतदेह..

आरमोरी(गडचिरोली):-आरमोरी-रवी बायपास मार्गावरील जंगल परिसरात कुजलेल्या अवस्थेत अज्ञाताचा मृतदेह आढळून आल्याने परिसरात एकच खळबळ उडाली आहे.घटनास्थळाच्या पाहणीवरून आढळून आलेला मृतदेह पुरुषाचा असल्याचा प्राथमिक अंदाज वर्तविण्यात येत आहे.सदर घटनेची माहिती काही नागरिकांनी आरमोरी पोलिसांना काल,२६ एप्रिल रोजी दिली.त्यानुसार सदरचे प्रकरण उजेडात आले.अशातच घटनास्थळी काही शालेय साहित्य मिळाले असल्याची चर्चा आहे.

माहितीनुसार,आरमोरी शहरापासून देसाईगंजमार्गे काही अंतरावर डम्पिंग यार्ड जवळ मोठा नहर असून उजवेस नवीन औद्योगिक प्रशिक्षण संस्था तर डावीकडून पश्चिमेस रवी बायपास डांबरीकरण मार्गाच्या ५०० मीटर म्हणजेच अर्धा किलोमीटर अंतरावर जंगलात दुर्गंधी सुटल्याने काही नागरिकांनी तेथे जाऊन पाहिले असता अनोळखी मृतदेह कुजलेल्या अवस्थेत दिसून आला.त्यानुसार उपस्थित नागरिकांनी आरमोरी पोलिसांना कळविले असता ठाण्याचे पोलीस निरीक्षक कैलास गवते हे सहकाऱ्यांसमवेत घटनास्थळी दाखल झाले. न्यायवैद्यक चाचणीसाठी पथकाच्या मदतीने मृतदेहाच्या हाडाचे नमुने घेऊन वैद्यकीय अधिकाऱ्यांना पाचारण करून जागेवरच उत्तरीय तपासणी करण्यात आली.शवविच्छेदन अहवाल प्राप्त होताच नेमके मृत्यूचे कारण काय? हत्या की आत्महत्या? हे कळणार आहे.जंगल परिसरात मृतदेह सापडल्याने शंका-कुशंका वाढीस लागलेल्या आहेत.