अवैध रेतीचा टीप्पर देसाईगंज तहसीलला जमा..! – पॉलिटिकल प्रेशर आणून पळवून नेऊ नये; चर्चांना उधाण..

देसाईगंज(गडचिरोली):-देसाईगंज तालुक्याच्या आमगाव-सावंगी चौकी परिसरात अवैध रेतीचा टीप्पर आज,रविवार २७ एप्रिलला सकाळी साडे अकरा वाजताच्या सुमारास वाहतूक चालान नसल्याने  पकडण्यात आला असून सदरचा टीप्पर देसाईगंज तहसील कार्यालयात जमा करण्यात आला आहे. सदरची कारवाई देसाईगंज महसूल पथकाद्वारे करण्यात आली.

अवैध वाळू वाहतुकीवर आळा घालण्याकरीता जिल्ह्यात सर्वत्र तपासणी चौक्या गडचिरोली जिल्हाधिकारी यांच्या आदेशानुसार उभारण्यात आल्या आहेत.त्यानुसार रेतीसाठी खाली जाणारे वाहन व रेती भरलेले वाहन चौकीतील अधिकारी, कर्मचारी नोंद घेऊन सर्वत्र तपासणी करीत आहेत. अशातच आज रविवार सकाळच्या सुमारास एम एच ३६ ए ए-२२९९ क्रमांकाचा रेती भरलेला टीप्पर आमगाव-सावंगी चौकी परिसरात आढळून आल्याने देसाईगंज महसूल पथकातील अधिकारी,कर्मचारी यांनी अडवणूक करून वाहतूक चालान बाबत विचारणा केली असता,संबंधित टीप्पर चालकाकडे वाहतूक चालान आढळून आली नसल्याने सदरचा अवैध रेती भरलेला टीप्पर देसाईगंज तहसील कार्यालयात पुढील कारवाईसाठी ताब्यात घेण्यात आला आहे.पकडण्यात आलेला टीप्पर कुणाचा? हे अद्याप कळू शकले नाही.आज रविवार असल्याने कार्यालयास सुट्टी असून उद्याला पंचनामा केल्यानंतरच स्पष्ट होणार आहे.त्यातच आता कुणी पॉलिटिकल प्रेशर आणून पकडलेला अवैध रेतीचा टीप्पर पळवून नेऊ नये,अश्या चर्चांना परिसरात उधाण आले आहे.