सरपंचा विरुद्ध अविश्वास प्रस्ताव; पदावरून खाली.. -आरमोरी तालुक्याच्या देलोडा ग्रामपंचायतीतील प्रकार…

आरमोरी(गडचिरोली):-आरमोरी तालुक्यातील देलोडा बु.ग्रामपंचायतीचे सरपंच डंबाजी हुलके यांच्यावर कर्तव्यात कसूर केल्याप्रकरणी इतर आठ सदस्यांनी अविश्वास प्रस्ताव मांडला.प्रस्ताव ८ विरुद्ध शून्य मतांनी पारित झाल्याने सरपंच हुलके यांना पदावरून पायउतार व्हावे लागले आहे.देलोडा बु.येथील सरपंच हुलके यांच्यावर उपसरपंच प्रमोद भोयर व इतर ७ सदस्यांनी सरपंच आपल्या पदाचा दुरुपयोग करून कर्तव्यात कसूर करतात,गावातील विकासकामे खुंटलेली असून सरपंच विश्वासात न घेता मनमानीने कामे करीत असल्याचा ३० सप्टेंबरला आक्षेप घेतला होता.याअंतर्गत आरमोरी तहसीलदारांनी नोटीस काढून काल,शुक्रवारी दुपारी १२ वाजता देलोडा बु.येथील ग्रामपंचायत कार्यालयात अविश्वास प्रस्तावाबाबत विशेष सभा आयोजित केली होती.तत्पूर्वी सरपंच हुलके यांनी आरमोरी पंचायत समितीचे संवर्ग विकास अधिकारी यांच्याकडे गुरुवारी  सरपंच पदाचा राजीनामा सोपविला.मात्र राजीनामा मंजूर होण्यापूर्वीच ग्रामपंचायत कार्यालय देलोडा बु. येथे तहसीलदार उषा चौधरी यांच्या उपस्थितीत विशेष सभा आयोजित करण्यात आली.सभेमध्ये सरपंच हुलके यांच्या विरोधात ८ सदस्यांनी अविश्वास ठराव पारित केल्याने सरपंच हुलके यांना पदावरून खाली व्हावे लागले.