विजेचा जोरदार धक्का लागल्याने कर्मचाऱ्याचा मृत्यू..

भंडारा :-शेतशिवारातील विद्युत वाहिनीतील तांत्रिक बिघाड दूर करत असतांनाच अचानकपणे विजेचा जोरदार धक्का लागून विद्युत वितरण कंपनीत कार्यरत असणाऱ्या कर्मचाऱ्याचा जागीच मृत्यू झाल्याची घटना आज,गुरुवार २७ ऑगस्ट रोजी सकाळच्या सुमारास पवनी तालुक्यातील भोजापूर शेतशिवार परिसरात घडली.अश्विन रघुनाथ लोणारे वय ४३ वर्षे, रा.कोसरा, ता.पवनी,जि.भंडारा असे मृतक कर्मचाऱ्याचे नाव असून ते महावितरण विभागामध्ये वरिष्ठ तंत्रज्ञ म्हणून कार्यरत होते.सध्या ते पवनीला वास्तव्यास होते.पवनी तालुक्यातील भोजापूर येथील शेतशिवारातील विद्युत वाहिनीत काही तांत्रिक बिघाड झाल्याने आज गुरुवारच्या सकाळी अश्विन लोणारे हे बिघाड दुरुस्त करण्यासाठी गेले होते.दरम्यान,सकाळी साडे आठ वाजताच्या सुमारास विद्युत वाहिनीची एबी स्विच करत असतांनाच त्यांना अचानकपणे विजेचा जोरदार धक्का बसला. धक्का इतका तीव्र होता की त्यांचा जागीच मृत्यू झाला. घटनेने लोणारे कुटूंबीय शोकसागरात बुडाले असून परिसरात हळहळ व्यक्त केली जात आहे.