पळवून नेलेल्या अल्पवयीन मुलीचा शोध घेण्यात पोलिसांना यश..

भंडारा :-जिल्ह्याच्या तुमसर पोलीस ठाण्यात अल्पवयीन मुलीला पळवून नेल्याच्या दाखल गुन्ह्यात १७ वर्षीय अल्पवयीन मुलगी व तिच्यासोबत असलेल्या संशयित आरोपीचा शोध घेण्यात अनैतिक मानवी वाहतूक प्रतिबंधक कक्षाच्या भंडारा पथकास यश आले आहे.चंद्रपूर जिल्ह्यातील घुग्घूस येथून अपहृत मुलगी व संशयित आरोपी दोघांनाही सुखरूप ताब्यात घेण्यात आले.तुमसर पोलीस ठाण्यात गुन्हा क्र.२६६/२०२५, कलम १३७(२)भारतीय न्याय संहिता अन्वये अल्पवयीन मुलीला पळवून नेल्याचा गुन्हा दाखल करण्यात आला होता.गुन्हा दाखल झाल्यापासून पोलिसांकडून तिचा शोध सुरू होता.दरम्यान,दोन दिवसांपूर्वी ७ ऑगस्टला भंडारा पथकातील महिला पोलिस हवालदार कुथे, पोलिस अंमलदार घरडे व पोलिस अंमलदार किरसान यांना मिळालेल्या गोपनीय माहितीच्या आधारे व तांत्रिक तपासाच्या आधारे दाखल गुन्ह्यातील अपहृत मुलगी आणि संशयित आरोपी राहुल बोरघरे रा.सुकळी यांचा शोध घेतला.तपासादरम्यान दोघेही घुग्घूस,जि.चंद्रपूर येथे असल्याचे निष्पन्न झाले.त्यानंतर,पथकाने तात्काळ तेथे पोहोचून दोघांनाही सुरक्षितरीत्या ताब्यात घेतले. अल्पवयीन मुलीला आवश्यक कायदेशीर प्रक्रियेसाठी पोलिसांच्या ताब्यात घेण्यात आले असून,मुलगी व संशयित आरोपीला गुन्ह्याच्या मूळ कागदपत्रांसह पुढील कायदेशीर कारवाईसाठी तुमसर पोलीस ठाण्याच्या स्वाधीन करण्यात आले आहे.सदरची कारवाई पोलीस अधीक्षक नूरुल हसन,अप्पर पोलीस अधीक्षक निलेश मोरे यांच्या मार्गदर्शनाखाली सहाय्यक पोलीस निरीक्षक रविंद्र लांडे यांच्या नेतृत्वात करण्यात आली.महिला पोलीस हवालदार अर्चना कुथे,मंजुषा घरडे व पोलीस अंमलदार मानिक किरसान यांनी शोधमोहीमेत महत्त्वाची भूमिका बजावली असून अल्पवयीन मुलीचा शोध लागल्याने कुटुंबीयांना मोठा दिलासा मिळाला आहे.