बसची ट्रॅक्टरला जोरदार धडक; ट्रॅक्टर चालकाचा खाली कोसळून मृत्यू..

भंडारा :-जिल्ह्याच्या साकोली तालुक्यातील विर्षी गावच्या ट्रॅक्टर चालकाचा अपघातात मृत्यू झाल्याची घटना आज,बुधवार ४ जून रोजी सकाळी साडे दहा वाजताच्या सुमारास राष्ट्रीय महामार्ग क्रमांक-५३ वर विर्शि फाटा येथे घडली.स्वतःच्या गावाहून राष्ट्रीय महामार्गाने साकोलीकडे ट्रॅक्टरने जात असतांना बसने ट्रॅक्टरला पाठीमागून धडक दिल्याने सदरचा अपघात घडला.यात ५० वर्षीय लेकचंद गोपीचंद कापगते रा. विर्षी,ता.साकोली याचा ट्रॅक्टर वरून खाली पडून मृत्यू झाला.

माहितीनुसार,लेकचंद कापगते हे आज सकाळच्या सुमारास ट्रॅक्टर क्रमांक-एमएच-३६ एन २११३ व ट्रॅक्टर ट्रॉली क्रमांक-एम एच ३६ ए एल ८२५५ ने  विर्षीकडुन साकोलीकडे जात असतांना गोंदियाकडून नागपूरच्या दिशेने जाणारी बस क्रमांक-एमएच ४० एन ८८७२ चे चालक विकास राहिनिनाथ लाडे वय ४० वर्षे, रा.मरारटोली,गोंदिया यांनी ताब्यातील बस भरधाव वेगाने चालवून ट्रॅक्टरला पाठीमागून धडक दिली.धडक देतातच ट्रॅक्टर चालक लेकचंद कापगते हे ट्रॅक्टरवरून रस्त्यावर खाली पडले.त्यांच्या डोक्याला व शरीराला गुपित मार लागल्याने लगेच त्यांना साकोली उपजिल्हा रूग्णालयात उपचारासाठी नेण्यात आले.अश्यातच तपासणी अंती डॉक्टरांनी लेकचंद यांना मृत घोषित केले.प्रकरणी बसचा चालक हा ट्रॅक्टर चालकाच्या मृत्यूस कारणीभूत असल्याने विर्षी येथील फिर्यादी मयंक कापगते यांच्या तोंडी तक्रारीवरून साकोली पोलिस ठाण्यात आरोपी बस चालकाविरुद्ध कलम २८१,१०६ भारतीय न्याय संहिता २०२३ सहकलम १८४ मोटर वाहन कायदा अन्वये गुन्हा दाखल करण्यात आला आहे.घटनेचा पुढील तपास पोलिस हवालदार दिनेश तिजारे करीत आहेत.