मोहफुल वेचत असतांनाच वाघाचा हल्ला; एकजण ठार..

भंडारा :-ऐन गुढीपाडव्याच्या दिवशीच वाघाने एका नागरिकास यमसदनी धाडल्याची घटना घडल्याने नागरिकांनी घटनेप्रती तीव्र संताप व्यक्त केला आहे. मोहफुल वेचण्यासाठी शेतशिवारात गेलेल्या एका ५० वर्षीय इसमावर वाघाने अचानकपणे हल्ला चढवून ठार केल्याची घटना आज,गुरुवार १९ मार्च रोजी दुपारच्या सुमारास भंडारा जिल्ह्याच्या साकोली तालुक्यातील बाम्पेवाडा वनपरिक्षेत्रांतर्गत येणाऱ्या उमरझरी-बाम्पेवाडा जंगल परिसरात उघडकीस आल्याने परिसरात एकच खळबळ उडाली आहे.वसंत गणपत मेश्राम वय ५० वर्षे, रा.बाम्पेवाडा,ता.साकोली,जि.भंडारा असे वाघाच्या हल्ल्यात ठार झालेल्या इसमाचे नाव आहे.सध्या ग्रामीण भागातील बऱ्याच ठिकाणी मोहफुल वेचणीचा हंगाम सुरू आहे.सकाळच्या सुमारास मोहफुल वेचने व गोळा केलेली मोहफुले वाळवून काही कालावधीनंतर त्यांची विक्री करून दोन पैसे उदरनिर्वाहासाठी लावणे,अशी हंगामी रोजीरोटी ग्रामीण भागातील नागरिक करीत असतात.अश्याच प्रकारे वसंत मेश्राम हे आज गुरुवारी सकाळच्या सुमारास शेतालगत असलेल्या मोहाच्या झाडाची मोहफुले वेचण्यासाठी गेले होते.शेत जंगल परिसराला लागूनच असल्याने मोहफुल वेचत असतांनाच अचानकपणे वाघाने वसंत मेश्राम यांच्यावर हल्ला चढवला आणि ठार केले.इकडे घरची मंडळी वसंत मेश्राम यांची घरी परतण्याची वाट पाहत होते. सकाळपासून मोहफुले वेचण्यासाठी गेलेले वसंत मेश्राम हे घरी न परतल्याने कुटूंबीय तसेच ग्रामस्थांनी शेत शिवारात तसेच जंगल परिसरात शोधाशोध केली असता काही अंतरावरच त्यांचा मृतदेह आढळून आला.घटनेची माहिती वन विभागास देण्यात आली.दरम्यान,घटनेची माहिती मिळताच वनविभागाचे अधिकारी,कर्मचारी व पोलिस प्रशासन घटनास्थळी दाखल झाले व घटनेचा पंचनामा करून पुढील तपासाची कारवाई करण्यात आली.घटनेने स्थानिक नागरिकांमध्ये दहशत निर्माण झाली असून परिसरात भीतीचे सावट पसरले आहे.