शेतातील लांबा,गवत कापण्यासाठी गेलेल्या महिलांना विद्युत तारेचा शॉक… – एका महिलेचा मृत्यू तर दुसरी महिला गंभीर जखमी..

चंद्रपूर :-विद्युत तारेचा शॉक लागून एका महिलेचा जागीच मृत्यू झाला.तर दुसरी महिला गंभीर झाल्याची घटना आज,शनिवार दिनांक-१९ ऑक्टोंबर सकाळच्या सुमारास चिमूर तालुक्यातील सावरगाव येथील शेत शिवारात घडली.सुंदराबाई चौधरी वय ६५ वर्षे असे मृत महिलेचे नाव आहे.तर कमलाबाई नन्नवरे वय ६० वर्षे असे गंभीर जखमी महिलेचे नाव आहे.

याबाबत अधिक माहिती अशी की,चिमूर तालुक्यातील सावरगाव येथील शेतकरी ताराबाई घुघुस्कर यांनी आपल्या शेतातील लांबा व गवत कापण्यासाठी दोन महिलांना मजुरीने बोलविले होते.त्यांनी शेतात वन्य प्राण्यांच्या उपद्रवापासून पिकांच्या रक्षणासाठी ताराचे कंपाऊंड केले होते.रात्रीच्या वेळी त्यावर विद्युत प्रवाह चालू ठेवला होता.आज शनिवारी सकाळी विद्युत प्रवाह बंद करण्याचे विसरल्याने विद्युत प्रवाह सुरूच राहिला.दोन महिला मजुरांनी शेतात प्रवेश करताच त्यांना जोरदार विद्युत शॉक बसला.यामध्ये सुंदराबाई चौधरी या महिलेचा जागीच मृत्यू झाला.तर कमलाबाई नन्नवरे ह्या गंभीर जखमी झाल्या असून त्यांना उपचारासाठी चिमूर येथील उपजिल्हा रुग्णालयात हलविण्यात आले आहे.