आरमोरी,गडचिरोली व अहेरी विधानसभा मतदारसंघाकरिता ४८५५ मतदान अधिकाऱ्यांची निवड..

गडचिरोली :-विधानसभा निवडणुकांचे बिगुल वाजताच सर्व शासकीय कार्यालयातील अधिकारी,कर्मचारी निवडणुकांच्या तयारी लागले आहेत.येत्या २० नोव्हेंबर रोजी राज्यात एकाच टप्प्यात मतदान प्रक्रिया पार पडणार आहे.अशातच आज शनिवारी गडचिरोली येथील जिल्हाधिकारी कार्यालयात विधानसभा निवडणुकीकरिता मतदान अधिकारी म्हणून नियुक्त करण्यात आलेल्या अधिकारी व कर्मचाऱ्यांची प्रथम सरमिसळीकरणाची (रॅण्डमायझेशन) प्रक्रिया पार पडली.गडचिरोली जिल्हा निवडणूक अधिकारी संजय दैने,नोडल अधिकारी शेखर शेलार,जिल्हा विज्ञान व सूचना अधिकारी संजय त्रिपाठी तसेच राजकीय पक्षाचे प्रतिनिधी यावेळी उपस्थित होते.

मतदान केंद्राध्यक्ष,मतदान अधिकारी क्रमांक १ व इतर मतदान अधिकारी यांची सरमिसळ प्रक्रिया जिल्हाधिकारी कार्यालयाच्या राष्ट्रीय सूचना केंद्रात संगणक प्रणालीद्वारे पूर्ण करण्यात आली.यात जिल्ह्यातील आरमोरी,गडचिरोली व अहेरी या तीन विधानसभा मतदारसंघाकरिता एकूण ४८५५ मतदान अधिकाऱ्यांची निवड करण्यात आली.यात आरमोरी क्षेत्राकरिता १५४६ अधिकारी,गडचिरोली क्षेत्राकरिता १८२१ तर अहेरी विधानसभा क्षेत्राकरिता १४८८  मतदान अधिकाऱ्यांची निवड करण्यात आली आहे. यात २७ महिला अधिकारी तर ६१ दिव्यांग मतदान अधिकाऱ्यांचा समावेश आहे.