रस्ता भटकल्या अन् गावात पोहचल्या; मुले पळविणाऱ्या समजून शेकडो लोकं झाले गोळा

भंडारा :-मुले चोरणाऱ्या टोळीमुळे सर्वत्र भीतीचे वातावरण पसरले आहे.नुकतेच १ मार्च २०२६ रोजी चंद्रपूर जिल्ह्याच्या बल्लारपूर येथील रेल्वे स्टेशन परिसरातून साडेतीन वर्षाच्या बालकाची चोरी करून त्याची साडेतीन लाखात विक्री करण्याचा प्रकार उघडकीस आला होता.प्रकरणी पाच आरोपी महिलांना तेलंगणा राज्यातून अटक करण्यात आली होती.यामुळे परिसरात एखादा अनोळखी इसम वा महिला भटकंती करतांना दिसून येताच नागरिकांचा पारा चढू लागला आहे.अश्याच प्रकारे भंडारा जिल्ह्याच्या साकोली तालुक्यातील एकोडी गाव परिसरात दोन दिवसांपूर्वी दोन महिलांना संशयास्पद स्थितीत फिरतांना पाहून नागरिकांचा पारा चढला आणि मुले पळविणाऱ्या म्हणून परिसरात अफवा पसरली.बघता-बघता शेकडो लोकांची गर्दी झाली.विशेष म्हणजे,दोन्ही महिलांची भाषा स्थानिक नागरिकांना समजत नसल्याने संशय आणखीनच बळावला व महिलांना बदडणार,तितक्यातच जिल्हा परिषद सदस्या माहेश्वरी नेवारे यांनी तातडीने एकोडी पोलिस चौकीचे पोलीस कर्मचारी वैरागडे आणि साकोली पोलीस ठाण्याचे स्वप्निल गोस्वामी यांना पाचारण केले. पोलिसांनी घटनास्थळावरून दोन्ही महिलांना आपल्या संरक्षणात साकोली पोलीस ठाण्यात नेले.तिथे केलेल्या सखोल चौकशीतअनिता चंदुलाल मोहारे व लक्ष्मी मोहारे रा.किंडगीपार-डोंगरगाव,जि.गोंदिया अशी महिलांची नावे असून त्या मानसिकदृष्ट्या काहीशा अस्वस्थ असल्याने रस्ता भरकटून परिसरात आल्या होत्या.त्या कोणत्याही गुन्हेगारी टोळीतील नसल्याचे निष्पन्न झाल्याने साकोली पोलिसांनी तात्काळ त्यांच्या नातेवाईकांशी संपर्क साधून पोलिस वाहनाने त्यांना सुरक्षितरित्या त्यांच्या घरी पोहोचविल्याने मोठा अनर्थ टळला.