नकली नोटा प्रकरणी दोघांना तुरुंगवास..

नागपूर :-आठ महिन्यांपूर्वी दोन तरुणांकडे पाचशे रुपयांच्या तब्बल २४३ नकली नोटा मिळून आल्याने नागपूर शहरात एकच खळबळ उडाली होती.प्रकरणी नागपूर जिल्हा सत्र न्यायालयाचे न्यायाधीश नितीन जाधव यांनी काल शुक्रवारी नकली नोटा व्यवहारात आणणाऱ्या दोन आरोपींना ७ वर्षे सश्रम कारावासाची शिक्षा सुनावली असून एकाला ५० हजार व दुसऱ्याला ५० हजाराचा दंड ठोठावला आहे.त्याचबरोबर,दंड न भरल्यास आरोपींना सहा महिन्यांचा अतिरिक्त कारावास भोगावा लागेल,असेदेखील स्पष्ट केले आहे.

अजिम तनू शेख वय २९ वर्षे व जमिरुल ऊर्फ मनीरुल लोकमान शेख हुसैन वय २७ वर्षे,दोघेही रा.कबरेज टोला,जि.मालदा,पश्चिम बंगाल अशी आरोपींची नावे आहेत.मागील वर्षाच्या ६ ऑगस्ट २०२५ रोजी विशेष पोलिस पथक गस्तीवर असतांना त्यांना नागपूरच्या मेयो हॉस्पिटलजवळच्या गार्ड लाइन परिसरामध्ये दोन युवकांकडे नकली नोटा असल्याची गोपनीय माहिती मिळाली होती.गोपनीय माहितीच्या आधारे पथकाने तात्काळ गार्ड लाइन परिसरात सापळा रचला.दोन्ही आरोपींना अडवून त्यांच्याकडील बॅग तपासली असता त्यात पाचशे रुपयांच्या २४३ नकली नोटा आढळून आल्या.पंचांसमक्ष जप्ती पंचनामा तयार करून आरोपींविरुद्ध तहसील पोलिस ठाण्यात गुन्हा दाखल करण्यात आला.त्यानंतर,तज्ज्ञांच्या तपासणीत संबंधित सर्व नोटा नकली असल्याचे आढळले. पोलिस निरीक्षक रसूल शेख यांनी संपूर्ण प्रकरणाचा तपास केला व जिल्हा सत्र न्यायालयात आरोपींविरोधात दोषारोपपत्र दाखल केले.न्यायालयात तब्बल ९ साक्षीदार तपासण्यात आले व विविध ठोस पुराव्यांच्या आधारे आरोपींवरील गुन्हा सिद्ध होताच न्यायालयाने दोन्ही आरोपींना तुरुंगवासाची वारी दाखवली.