लोखंडी पाईपांच्या आड गांजाची तस्करी; तिघांना अटक..

पश्चिम बंगालमधील दोन तस्कर ओडिशाच्या संबलपूरहून गांजाचा मोठा साठा घेऊन नागपूरला येणार असल्याची गोपनीय माहिती एनसीबीला मिळाली होती.हा साठा नागपूरमधील मुख्य स्वीकारकर्ता एस.ए.एस.युसूफ याच्याकडे सुपूर्द केला जाणार होता.या माहितीच्या आधारे,एनसीबी अधिकाऱ्यांनी नागपूरमध्ये पाळत ठेवली आणि संशयित ट्रकच्या हालचालींवर लक्ष ठेवले.पहाटे नागपूर-भंडारा मार्गावरून जात असतांना हुडकेश्वर भागातील आउटर रिंग रोडवरील महादेव ढाब्याजवळ हा ट्रक अडवण्यात आला.पथकाने तपासणी केली असता ट्रकमध्ये वरच्या बाजूला लोखंडी पाईप ठेवले होते.तर त्याखाली लपवून ठेवलेला तब्बल ५०० किलोचा गांजा आढळून आला.ट्रकमध्ये असलेल्या पश्चिम बंगालमधील आर.पी.गोलदार आणि आर्यन सरकार यांना एनसीबीने ताब्यात घेतले.प्राथमिक चौकशीत त्यांनी नागपुरातील गांजाचा मुख्य स्वीकारकर्ता एस.ए.एस.युसूफ ऊर्फ राजाभाई याचे नाव सांगितले.त्यानंतर पथकाने सापळा रचून युसूफलाही अटक केली.चौकशीत युसूफ चार वर्षांपासून गांजा तस्करीच्या नेटवर्कमध्ये सक्रिय होता. त्याच्याविरुद्ध यापूर्वीही अंमली पदार्थ प्रतिबंधक कायद्यान्वये(एनडीपीएस)गुन्हे दाखल आहेत. चौकशीनुसार,गांजाची ही खेप ओडिशातील संबलपूर येथून ट्रकमध्ये भरली होती.गोलदार आणि आर्यन सरकार यांच्यावर ती नागपुरात युसूफपर्यंत पोहोचवण्याची जबाबदारी होती.नागपुरातून पुढे गांजाचा पुरवठा महाराष्ट्रातील जालना आणि मध्य प्रदेशातील इंदूर येथे केला जाणार असल्याचे तपासात समोर आले आहे.पोलिस आणि तपास यंत्रणांच्या नजरेतून बचाव करण्यासाठी आरोपी महामार्गावरील मार्ग बदलून ट्रक चालवत असल्याचेही चौकशीत निष्पन्न झाले असून प्रकरणाचा अधिक तपास सुरू आहे.