‘तुझ्याविना मी जगूच शकत नाही’ असे म्हणत प्रियकराचा प्रेयसीच्या जळत्या सरणावर उडी मारण्याचा प्रयत्न.. – नागरिकांनी प्रियकरास पकडून धो-धो धुतले..

नागपूर :- ‘तुझ्याविना मी जगूच शकत नाही’ असे म्हणत प्रेमात वेडा झालेल्या प्रियकराने चक्क प्रेयसीच्या जळत्या सरणावर उडी मारण्याचा प्रयत्न केला.पण उपस्थित नागरिकांच्या लक्षात येताच त्याला पकडून चांगलेच धो-धो धुतले असल्याची घटना काल,सोमवार ९ जून रोजी सायंकाळी चार वाजेच्या सुमारास कामठी शहरालगतच्या कन्हान नदी परिसरातील शांतीघाट स्मशानभूमीत प्रेयसीवरअंत्यसंस्कार पार पडतांना घडली.अंशिका नितीन खोब्रागडे वय १९ वर्षे,रा.हनुमाननगर,कन्हान,ता. पारशिवनी,जि.नागपूर असे मृत प्रेयसीचे तर अनुराग राजेंद्र मेश्राम वय २७ वर्षे,रा.हनुमाननगर,कन्हान, ता. पारशिवनी असे जखमी प्रियकराचे नाव आहे.दोघेही एकाच भागात राहणारे असल्याने त्यांची आपसात ओळख होती.ओळखीचे रूपांतर प्रेमसंबंधात झाले.त्यातच रविवारी ८ जूनला प्रेयसीने सायंकाळच्या सुमारास अचानकपणे घरीच एका खोलीत दुपट्ट्याने  गळफास घेऊन आत्महत्या केली.कुटुंबियांच्या लक्षात येताच कुटुंबीयांनी तिला खाली उतरवून लगेच खासगी रुग्णालयात नेले.तपासणीअंती डॉक्टरांनी तिला मृत घोषित केले.कन्हान पोलिसांनी अकस्मात मृत्यूची नोंद करून शव शवविच्छेदनासाठी कामठी शहरातील उपजिल्हा रुग्णालयात पाठविले.उत्तरीय तपासणी प्रक्रिया पार पडल्यानंतर काल सोमवारी सायंकाळी तिच्या पार्थिवावर अंत्यसंस्कार करण्यात आले.तिथे प्रियकर अनुराग मेश्रामही उपस्थित होता.अश्यातच त्याने जळत्या सरणावर उडी मारण्याचा प्रयत्न करताच नागरिकांनी त्याला पकडून चांगलेच धो-धो धुतले. मारहाणीत अनुराग मेश्राम नदीच्या पात्रात बेशुद्ध पडला होता.प्रकाराची माहिती काही नागरिकांनी त्याच्या वडिलांना दिली.वडील राजेंद्र व भाऊ पवन यांनी कन्हान पोलिसांना सोबत घेऊन घटनास्थळ गाठले.तोपर्यंत तो तिथेच पडून होता. त्यांनी अनुरागला कामठी शहरातील खासगी रुग्णालयात भरती केले.काही नागरिकांच्या मते,घटनेच्या वेळी प्रियकर अनुराग मेश्राम दारू पिऊन होता.