आता तीन कल्याणकारी योजनांना इंदिरा गांधींच्या नावाऐवजी ‘प्रधानमंत्री’ शब्द..

उद्रेक न्युज वृत्त :-नुकतीच देशाचे पंतप्रधान नरेंद्र मोदी यांच्या अध्यक्षतेखाली केंद्रीय मंत्रिमंडळाची बैठक पार पडली.या पार पडलेल्या बैठकीत केंद्रीय मंत्रिमंडळाने तीन कल्याणकारी योजनांची नावे बदलण्यास मंजुरी दिली असून यापुढे तीन कल्याणकारी योजनांना इंदिरा गांधींच्या नावाऐवजी ‘प्रधानमंत्री’ शब्द जोडण्यात येणार आहे.यामध्ये इंदिरा गांधी राष्ट्रीय वृद्धापकाळ निवृत्तिवेतन योजनेस आता ‘प्रधानमंत्री वृद्धापकाळ निवृत्तिवेतन योजना’ तर इंदिरा गांधी राष्ट्रीय विधवा निवृत्तिवेतन योजनेस आता ‘प्रधानमंत्री विधवा निवृत्तिवेतन योजना’ व इंदिरा गांधी राष्ट्रीय दिव्यांग निवृत्तिवेतन योजनेस आता ‘प्रधानमंत्री दिव्यांगजन निवृत्तिवेतन योजना’ म्हणून ओळखली जाणार आहे.त्याचबरोबर,केंद्रीय मंत्रिमंडळाने राष्ट्रीय सामाजिक सहाय्य कार्यक्रमाचे नाव बदलून ‘प्रधानमंत्री सामाजिक सहाय्य योजना’ करण्यास मंजुरी दिली आहे.या कार्यक्रमांतर्गत येणाऱ्या इतर योजनांच्या नावांमध्येही बदल करण्यात आले आहेत. ‘राष्ट्रीय कुटुंब लाभ योजने’चे नाव बदलून ‘प्रधानमंत्री कुटुंब लाभ योजना’ असे करण्यात आले आहे.दरम्यान,ज्येष्ठ नागरिक आणि विधवा महिलांसाठीच्या निवृत्तिवेतन योजना तसेच कुटुंब लाभ योजना सध्याच्या स्वरूपातच सुरू राहणार आहेत.तसेच दिव्यांग व्यक्तींसाठीच्या निवृत्तिवेतन योजनेच्या पात्रता निकषांमध्येही महत्त्वाचे बदल करण्यात आले आहेत.दिव्यांगत्वाची निर्धारित मर्यादा ८० टक्क्यांवरून ४० टक्क्यांपर्यंत कमी करण्यात आली आहे.त्यामुळे पात्र लाभार्थ्यांची व्याप्ती वाढण्याची शक्यता आहे.