धावत्या ट्रकचा टायर फुटून भीषण आग; दोघांचा ट्रकमध्येच होरपळून मृत्यू..

उद्रेक न्युज वृत्त :-फुलकोबी घेऊन जाणाऱ्या धावत्या ट्रकचा अचानक टायर फुटल्याने ट्रकला भीषण आग लागून क्षणात आगीने रौद्ररूप धारण केले.आग इतकी वेगाने पसरली की ट्रकमध्ये बसलेल्या दोन जणांना बाहेर पडण्याची संधीच मिळाली नसल्याने ट्रकमधील दोन जणांचा जागीच होरपळून मृत्यू झाल्याची घटना आज,सोमवार १२ ऑक्टोंबर रोजी सकाळच्या सुमारास मुंबई-नागपूर समृद्धी महामार्गावरील अमरावती जिल्ह्यातील नांदगाव खंडेश्वर तालुक्यातील तळेगाव पोलीस स्टेशनच्या हद्दीत घडली.मृत पावलेल्या दोघांची अद्याप नावे समोर आलेली नसून घटनेची माहिती मिळताच तळेगाव पोलीस आणि महामार्ग पोलीस घटनास्थळी दाखल झाले.पोलिसांनी मृतदेह ताब्यात घेत पुढील तपास सुरू केला आहे. सदरचा अपघात हा मुंबई-नागपूर समृद्धी महामार्गावरील चॅनेल नंबर १२७ वर घडला.ट्रक समृद्धी महामार्गावरून जात असतांनाच अचानक ट्रकचा टायर मोठ्या आवाजासह धाडकन फुटला. टायर फुटल्यामुळे चालकाचे वाहनावरील नियंत्रण सुटले आणि ट्रकला अचानक मोठ्या प्रमाणावर आग लागली.क्षणात आग इतकी वेगाने पसरली की ट्रकमध्ये बसलेल्या दोन जणांना बाहेर पडण्याची संधीच मिळाली नाही आणि त्यांचा घटनास्थळीच दुर्दैवी होरपळून मृत्यू झाला.दरम्यान,दुर्घटनेनंतर समृद्धी महामार्गावर काहीकाळ मोठ्या प्रमाणात वाहतूक कोंडी झाली.पोलिसांनी वाहतूक सुरळीत करून घटनेची चौकशी सुरू केली आहे.