आज ‘या’ जिल्ह्यात जाणवले भूकंपाचे धक्के..!

उद्रेक न्युज वृत्त :-महाराष्ट्र राज्याच्या पालघर जिल्ह्यात आज,गुरुवार ८ ऑक्टोंबर रोजी सायंकाळी सुमारे ७ वाजून १६ मिनिटाच्या दरम्यान ३.७ रिश्टर स्केल तीव्रतेच्या भूकंपाचे धक्के जाणवले.यात जिल्ह्याच्या तलासरी तालुक्यातील कुर्झे परिसर हा या भूकंपाचा केंद्रबिंदू असल्याची नोंद भारतीय भूकंपमापक संस्थेने केली आहे.भूकंपाचा केंद्रबिंदू जमिनीखाली सुमारे ७ किलोमीटर खोलीवर असल्याची प्राथमिक माहिती समोर आली आहे.तलासरी,धुंदलवाडी,मोडगाव आणि कासा परिसरात भूकंपाचे हादरे बसले.बऱ्याच कालावधीपासून पालघर जिल्ह्यातील डहाणू आणि तलासरी तालुक्यात सौम्य ते जास्त तीव्रतेचे भूकंपाचे धक्के बसत असल्याने नागरिकांमध्ये भीतीचे वातावरण पसरले आहे.पालघर जिल्ह्याच्या डहाणू आणि तलासरी परिसरात भूकंपाच्या घटनांची वारंवारता लक्षात घेता प्रशासनाने या परिसरातील भूकंपाच्या हालचालींवर सातत्याने लक्ष ठेवण्याची गरज व्यक्त होत आहे.भूकंपाच्या धक्क्याने जमीन अचानक हादरल्याने नागरिक घाबरले व घराबाहेर पळाले.यात कुठल्याही प्रकारची जीवितहानी झालेली नाही; मात्र वारंवार होणाऱ्या कंपनाने नागरिक काहीकाळ दहशतीखालील जीवन जगू लागले आहेत.