अखेर उद्या होणारा व्यापारी संघटनांचा ‘नो यूपीआय डे’ मागे..!

उद्रेक न्युज वृत्त :-यूपीआय व्यवहारांवर मर्चेंट डिस्काउंट रेट(MDR)लागू करण्याच्या हालचाली सुरू झाल्याने या प्रस्तावित निर्णयाविरोधात व्यापारी संघटनांनी आक्रमक पवित्रा घेतला होता.या निर्णयाचा तीव्र निषेध नोंदवण्यासाठी ‘ऑल इंडिया मोबाइल रिटेलर्स असोसिएशन'(एआयएमआरए)या व्यापारी संघटनेने उद्या,शुक्रवार २ ऑक्टोंबर रोजी देशभरात ‘नो यूपीआय डे’ पाळण्याचे मोठे आवाहन केले होते.राष्ट्रपिता महात्मा गांधी यांच्या जयंती दिनाचे औचित्य साधून २ ऑक्टोंबर रोजी राज्यभरासह देशभरातील मोबाईल विक्रेते आपला निषेध नोंदवणार होते.या दिवशी ग्राहकांना फक्त रोख म्हणजेच कॅश किंवा कार्डद्वारे व्यवहार करण्याचे आवाहन केले होते.मात्र,केंद्रीय अर्थमंत्री निर्मला सीतारामन यांच्यासोबत व्यापारी प्रतिनिधींची बैठक झाल्यानंतर उद्या होणारा ‘नो यूपीआय डे’चा प्रस्तावित निषेध मागे घेण्याचा निर्णय व्यापारी संघटनांनी घेतला आहे.राजधानी दिल्लीतील चांदणी चौकचे खासदार आणि कन्फेडरेशन ऑफ ऑल इंडिया ट्रेडर्सचे महासचिव प्रवीण खंडेलवाल यांच्या नेतृत्वाखाली सुमारे वीस वरिष्ठ व्यापारी आणि किरकोळ विक्रेता प्रतिनिधींनी केंद्रीय अर्थमंत्री निर्मला सीतारामन यांची नवी दिल्ली येथे भेट घेतली.या बैठकीत प्रस्तावित यूपीआय एमडीआर मुळे लहान आणि मध्यम व्यापाऱ्यांवर होणाऱ्या संभाव्य आर्थिक परिणामांबाबत चिंता व्यक्त करण्यात आली. व्यापारी प्रतिनिधींनी या शुल्काबाबत सरकारसमोर विविध सूचना आणि मागण्या मांडल्या.व्यापारी संघटनांच्या अडचणी व सूचनांचा सरकारकडून विचार केला जाईल,असे आश्वासन देण्यात आल्याने ‘नो यूपीआय डे’ निषेध मागे घेण्यात आला.