काँग्रेसकडून विधान परिषद निवडणुकीसाठी तीन उमेदवारांची घोषणा.. -नागपूर पदवीधर मतदार संघासाठी अभिजीत वंजारी यांना पुन्हा एकदा उमेदवारी जाहीर..

उद्रेक न्युज वृत्त :-नुकतेच मंगळवार २२ सप्टेंबर २०२६ रोजी निवडणूक आयोगाने महाराष्ट्र विधानपरिषदेच्या तीन पदवीधर आणि दोन शिक्षक मतदारसंघांच्या निवडणुकीची अधिकृत घोषणा  केली.यामध्ये नागपूर पदवीधर मतदार संघ,पुणे पदवीधर मतदार संघ, औरंगाबाद पदवीधर मतदार संघ,तर अमरावती शिक्षक मतदार संघ व पुणे शिक्षक मतदार संघाचा समावेश आहे.निवडणुकीसाठी अर्ज प्रक्रिया २९ सप्टेंबरपासून सुरू झाली असून २३ ऑक्टोंबर रोजी मतदान व २७ ऑक्टोंबर २०२६ रोजी मतमोजणी व निकाल जाहीर होणार आहे. अश्यातच आता विधानपरिषदेच्या निवडणुकीला वेग आला आहे.सर्वच राजकीय पक्षांनी हालचाली सुरु केलेल्या असतांनाच विधान परिषद निवडणुकीसाठी काँग्रेस पक्षाने आपल्या तीन उमेदवारांची यादी जाहीर केली आहे.यात नागपूर पदवीधर,अमरावती शिक्षक व पुणे शिक्षक मतदारसंघाच्या निवडणुकीसाठी काँग्रेसकडून उमेदवारांची यादी जाहीर करण्यात आली आहे.नागपूर पदवीधर मतदार संघासाठी अभिजीत वंजारी यांना पुन्हा एकदा उमेदवारी जाहीर करण्यात आली आहे.तर दुसरीकडे पुणे विभाग शिक्षक मतदारसंघातून जयंत आसगावकर यांना उमेदवारी जाहीर करण्यात आली आहे.तर अमरावती विभाग शिक्षक मतदार संघामधून अदिती पोहरे यांना उमेदवारी जाहीर झाली आहे. याबाबत पक्षाध्यक्ष मल्लिकार्जुन खरगे यांच्या मान्यतेनंतर सरचिटणीस के.सी.वेणुगोपाल यांनी काल शुक्रवारच्या रात्री उमेदवारांची घोषणा केली.

विशेष म्हणजे,नागपूर पदवीधर मतदार संघ भाजपचा अभेद्य बालेकिल्ला मानला जातो.मात्र,गेल्यावेळी काँग्रेसचे आमदार ॲड.अभिजित वंजारी यांनी तो उद्धवस्त केला होता.अश्यातच वंजारी यांची उमेदवारी निश्चित मानली जात होती.त्यामुळे पक्षाकडून कुणीही या जागेवर दावा केला नाही.नागपूर विद्यापीठाच्या सिनेटमधून राजकीय क्षेत्रात प्रवेश करणारे अभिजित वंजारी यांनी २०१४ साली पूर्व नागपुरातून विधानसभा निवडणूक लढवली.मात्र,त्यांना त्यात यश आले नाही.यानंतर त्यांनी दोन वर्षे मतदारसंघात काम केल्यानंतर नागपूर विभाग पदवीधर मतदारसंघात संपर्क सुरू केला.२०२० साली पक्षाने त्यांना संधी दिली आणि वंजारी यांनी भाजपचा अभेद्य बालेकिल्ला सर करून काँग्रेसचा झेंडा फडकवला. सध्या भाजपने उमेदवार जाहीर केला नसला तरी बालेकिल्ला हातात राहण्यासाठी कंबर कसली आहे.येत्या,२३ ऑक्टोंबरला होणाऱ्या निवडणुकीत भाजपला हा मतदारसंघ पुन्हा ताब्यात घेण्याचे,तर काँग्रेससमोर विद्यमान जागा कायम राखण्याचे मोठे आव्हान आहे.