आगामी काळात अन्न धान्याची भीषण टंचाई निर्माण होण्याची शक्यता..

उद्रेक न्युज वृत्त :-यंदा महाराष्ट्र राज्यात पड़लेल्या भीषण दुष्काळामुळे खरीप हंगामातील पिकांचे मोठ्या प्रमाणात नुकसान झाले आहे.शेतातील उभी पिके उद्धवस्त झाल्याने ग्रामीण अर्थव्यवस्था संकटात सापडली असून,आगामी काळात राज्यात धान्य, कडधान्ये आणि तेलबियांची भीषण टंचाई निर्माण होण्याची शक्यता आहे.राज्यात पावसाचे प्रमाण कमी राहिल्याने खरीप हंगामातील ज्वारी,बाजरी,तांदूळ आणि मका या पिकांच्या उत्पादनात ५५ ते ६० टक्क्यांपर्यंत घट होण्याचा अंदाज आहे. सोयाबीन आणि भुईमुगाच्या उत्पादनातही सुमारे ६५ टक्के घट होण्याची शक्यता आहे.पावसाअभावी कोकण आणि पूर्व विदर्भातील आठ लाख हेक्टरपेक्षा अधिक क्षेत्रातील भातशेती प्रभावित झाली आहे. अश्यातच तूर,मूग आणि उडदाच्या उत्पादनातही ६५ टक्क्यांहून अधिक घट होण्याचा अंदाज आहे.या परिस्थितीमुळे यंदाच्या रब्बी हंगामात गहू,हरभरा आणि हिरव्या भाजीपाल्याच्या पेरणी क्षेत्रात ७० टक्क्यांपर्यंत घट होण्याची शक्यता आहे.ऊस उत्पादनातही सुमारे २५ टक्के घट होण्याचा अंदाज असून,त्याचा परिणाम राज्यातील वखार उद्योगावर तसेच बाजारातील साखरेच्या उपलब्धतेवर होऊ शकतो.धान्य आणि अन्य खाद्यपदार्थांचा पुरवठा विस्कळीत झाल्यास बाजारात महागाई झपाट्याने वाढू शकते.परिणामी, सर्वसामान्य नागरिकांना अन्नधान्याच्या टंचाईचा सामना करावा लागू शकतो.यासाठी सरकारने आतापासूनच अन्नधान्याच्या उपलब्धतेचे नियोजन करावे,अशी मागणी आता जोर धरू लागली आहे.