नगर परिषदेच्या मुख्याधिकाऱ्यांविरोधात कर्मचाऱ्यांचा एल्गार; अंतर्गत संघर्ष चव्हाट्यावर..

चिमूर नगर परिषदेतील कर्मचाऱ्यांच्या अनेक मागण्या प्रलंबित आहेत.या मागण्यांबाबत वारंवार निवेदने सादर करूनही,मुख्याधिकारी कार्यालयाकडून कोणताही सकारात्मक प्रतिसाद देण्यात आला नाही.उलट, मागण्यांवर चर्चा न करता अपमानास्पद भाषेत बोलणे, आढावा बैठकीत अयोग्य शब्द वापरणे आणि कारवाईची भीती दाखवणे सुरू असल्याचा आरोप कर्मचाऱ्यांनी केला आहे.विशेषतः कर वसुलीच्या आढावा बैठकीत, काही कर्मचाऱ्यांना वसुली कमी असल्याच्या कारणावरून वेतन रोखण्याची,एक महिन्याचा पगार कापण्याची,चौकशी लावण्याची आणि निलंबन करण्याची धमकी देण्यात आल्याचे निवेदनात म्हटले आहे.सुट्टीच्या दिवशीही हजर राहण्यास सांगणे,रजा मागितल्यास ती नाकारणे आणि कोणतीही पूर्वसूचना न देता बेकायदेशीर वेतन कपात करणे,यामुळे कर्मचाऱ्यांचा मानसिक तणाव प्रचंड वाढला असून कामाचे वातावरण भयग्रस्त झाल्याचा उल्लेख करण्यात आला आहे.