नागपूर पदवीधर मतदारसंघात कोण मारणार बाजी? राजकीय वर्तुळात उत्सुकता..

नागपूर :-नागपूर विभाग पदवीधर मतदारसंघाच्या निवडणुकीचा निकाल आज,मंगळवार २७ ऑक्टोंबरला जाहीर होणार असून अभिजीत वंजारी वर्सेस सुधाकर कोहळे यांच्यापैकी कोण बाजी मारणार,याबाबत राजकीय वर्तुळात उत्सुकता वाढली आहे.विशेष म्हणजे, पहिल्या पसंतीच्या मतांमध्येच निकाल स्पष्ट झाल्यास सायंकाळपर्यंत निकालाचे चित्र स्पष्ट होण्याची शक्यता आहे.मात्र,दुसऱ्या पसंतीच्या मतांची मोजणी करावी लागल्यास निकालासाठी रात्री उशीर होऊ शकतो.

काँग्रेसचे ॲड.अभिजीत वंजारी आणि भाजपचे सुधाकर कोहळे यांच्यात प्रमुख लढत होत आहे.मात्र,या दोघांच्या विजयाच्या दाव्यांपेक्षाही माजी आमदार प्रा.अनिल सोले यांना किती मते मिळणार,याची चर्चा अधिक रंगली आहे. दुसरीकडे,शरदचंद्र पवार राष्ट्रवादी काँग्रेसचे बंडखोर उमेदवार नितेश कराळे यांना किती मते मिळतात, हेदेखील महत्त्वाचे ठरणार आहे.गेल्या निवडणुकीत तिसऱ्या उमेदवाराने लक्षणीय मते घेतली होती.यंदाही प्रमुख उमेदवारांव्यतिरिक्त इतर उमेदवारांना मिळणारी मते निकालाचे गणित बदलवू शकतात.त्यामुळे वंजारी आणि कोहळे यांच्यातील मताधिक्य किती राहणार, याबाबत विविध अंदाज वर्तवले जात आहेत.दरम्यान, काँग्रेस नेते विजय वडेट्टीवार यांनी दावा केला आहे की,अभिजीत वंजारी यांची नागपूर शहरातील कामगिरी काहीशी कमजोर दिसली असली,तरी नागपूर ग्रामीणसह विभागातील उर्वरित जिल्ह्यांतील ग्रामीण भागातून त्यांना भरघोस पाठिंबा मिळाला आहे.नागपूर शहरात पक्षातील अनेक नेत्यांची भूमिका या निवडणुकीत पक्षहिताची राहिलेली नाही.कुणाची नावे घेणे योग्य ठरणार नाही; मात्र काही नेते बऱ्याच उशिरा सक्रिय झाले,असे वडेट्टीवार यांनी म्हटले.