उद्रेक न्युज वृत्त
चंद्रपूर :-चंद्रपूर जिल्ह्यातच नव्हे तर नागपूर, भंडारा, गोंदिया, गडचिरोली व विदर्भासहित कोकणातील इतर जिल्ह्यातही मुसळधार पावसाने थैमान घातला आहे.पावसामुळे सगळीकडेच जनजीवन विस्कळित झाले आहे.अशातच एक मोठी घटना समोर आली आहे.पुरात एसटी बस अडकल्याची घटना चंद्रपूर जिल्ह्याच्या पोंभुर्णा तालुक्यात घडली आहे.पुराच्या पाण्याची पातळी वाढत असताना चालक,वाहक आणि प्रवाशांनी लगेचच पुराच्या बाहेर पडण्याचा निर्णय घेतल्याने मोठी दुर्घटना टळली आहे.
गोंडपिंपरी-मुल मार्गाची एसटी बस पोंभूर्णा येथून मुलकडे निघाली होती.सुशी गावाजवळील पुलावरून पाणी वाहत होते.चालकाने गाडी थांबवली आणि पुराच्या पाण्याचा अंदाज घेतला.मात्र,काही वेळातच पूर वाढला.पाण्याची पातळी वाढली.चालकाने सतर्कता बाळगत दोन नाल्याच्या मध्यभागी असलेल्या टेकडाच्या भागावर बस नेली.चालक,वाहक,प्रवासी तिथून सुखरूप बाहेर पडले.मात्र,मागील २४ तासांपासून बस अजूनही पुरात अडकून पडली आहे.
