खर्रा खाणाऱ्यांनो सावधान..! बाजारात नकली तंबाखूचा शिरकाव.. – मशीनच्या सहाय्याने नकली तंबाखू तयार करणाऱ्यासह ११ लाख रुपयांचा मुद्देमाल जप्त..

चंद्रपूर :-विदर्भातील बऱ्याचश्या जिल्ह्यात आजही जवळपास ७० ते ८० टक्के लोकं खर्रा खाण्याचे शौकीन आहेत.तंबाखूची वाढती मागणी लक्षात घेता “मरणारे मरोत आणि आमचे पोट भरोत” असे अनेकजण पैश्याच्या हव्यासापोटी नागरिकांच्या जीवाशी खेळ करू लागलेत.त्यामुळे खर्रा खाणाऱ्यांनो सावधान..अशी म्हणण्याची वेळ आली आहे.अश्याच प्रकारे चंद्रपूर जिल्ह्याच्या सावली तालुक्यात एका नकली तंबाखू तयार करणाऱ्या कारखान्याचा भांडाफोड झाला आहे.या प्रकरणी एलसीबी पथक,सावली पोलीस प्रशासन आणि अन्न सुरक्षा विभागाने संयुक्तरित्या कारवाई करून मशीनच्या सहाय्याने बनावट तंबाखूची निर्मिती व विक्री करणाऱ्या केंद्रावर धाड मारून तब्बल ११ लाख ३१ हजार ४०० रुपयांचा मुद्देमाल जप्त केला आहे.विजय भीमाजी भांडेकर वय ३२ वर्षे,रा.सामदा बु.,ता.सावली, जि.चंद्रपूर असे अटकेतील आरोपीचे नाव असून प्रकरणी आरोपीविरुद्ध अन्न सुरक्षा व मानके अधिनियम २००६ तसेच भारतीय न्याय संहिता(बीएनएस)अंतर्गत विविध कलमान्वये सावली पोलीस ठाण्यात गुन्हा दाखल करण्यात आला.पोलिसांनी होला व इगल ब्रँडचा तंबाखू,खुला सुगंधित तंबाखू,पॅकिंग साहित्य, उत्पादनासाठी वापरण्यात येणारी यंत्रसामग्री(मशीन) तसेच एमएच-३४-सीजे-९६२५ क्रमांकाचा एक चारचाकी वाहन असा मुद्देमाल जप्त केला.सदरची कारवाई ही सावली तालुक्याच्या रयतवारी येथे करण्यात आली. चौकशीदरम्यान आरोपीने तंबाखू निर्मितीसाठी लागणारा कच्चा माल गडचिरोली येथील एका इसमाकडून खरेदी केल्याची कबुली दिली.जप्त साहित्यावरून मोठ्या प्रमाणात बनावट तंबाखूचे उत्पादन करून त्याची बेकायदेशीर विक्री केली जात असल्याचे प्राथमिक तपासात निष्पन्न झाले आहे.