डाटा एन्ट्री ऑपरेटरकडे चार हजार रुपये द्यायला सांगताच एसीबीची धाड; दोघेजण अडकले जाळ्यात..

चंद्रपूर :-मालमत्तेची नोंदणी करण्यासाठी गेलेल्या तक्रारदारास दुय्यम निबंधक कार्यालयातील दोन मालमत्तांच्या रजीस्ट्रीचे चार हजार रुपये लागतील,असे सांगून ते पैसे डाटा एन्ट्री ऑपरेटरकडे देण्यास सांगताच चंद्रपूर लाच लुचपत प्रतिबंधक विभागाच्या पथकाने दोघांनाही रंगेहाथ पकडले.मोहन चंद्रकांत शेट्टीवार वय ४० वर्षे,पद-दुय्यम निबंधक(श्रेणी-१)कार्यालय-दुय्यम निबंधक,मुद्रांक नोंदणी विभाग,चंद्रपूर व त्याचा खासगी डाटा एन्ट्री ऑपरेटर या दोघांना काल मंगळवारी ताब्यात घेतले.

याबाबत अधिक माहिती अशी की,प्रकरणातील  तक्रारदार यांनी त्यांचे पक्षकार यांची चंद्रपूर जिल्ह्याच्या भद्रावती तालुक्यातील मालमत्तेची नोंदणी होण्याकरीता दुय्यम निबंधक कार्यालय चंद्रपूर येथे कागदपत्रे सादर केली असता मोहन शेटट्टीवार यांनी दुय्यम निबंधक कार्यालय चंद्रपूर येथे दस्तऐवजाची नोंदणी केली. त्याबदल्यात त्यांचे ऑपरेटर मार्फत ४ हजार रूपये लाचेची मागणी केली.परंतु तक्रारदार यांना लाच देण्याची मुळीच ईच्छा नसल्याने त्यांनी मंगळवार १६ जून २०२६ रोजी लाचलुचपत प्रतिबंधक विभाग कार्यालय चंद्रपुर येथे प्रत्यक्ष हजर होऊन तक्रार दिली.तक्रारदार यांचे प्राप्त तक्रारीवरून काल मंगळवारी मोहन शेटट्टीवार, दुय्यम निबंधक यांची पंचासमक्ष पडताळणी व सापळा कारवाई केली असता त्यांनी तक्रारदार यांचे पक्षकार यांच्या मालमत्तेच्या दस्तऐवजाची नोंदणी करून दिल्याचा मोबदला म्हणून ४ हजार रूपये लाचेची मागणी करून त्यांचे ऑपरेटर मार्फत स्वीकारताच दोघांनाही रंगेहाथ अटक करून पुढील तपास कार्य सुरू केले आहे.