राज्यात दुष्काळ जाहीर करण्याच्या हालचालींना वेग..

उद्रेक न्युज वृत्त :-यंदा पावसाने दडी मारल्याने महाराष्ट्र राज्यातील अनेक जिल्ह्यांमध्ये दुष्काळ सदृश्य परिस्थिती उद्भवलेली आहे.अस्मानी संकटामुळे शेतकरी बांधव हवालदिल झाला आहे.राज्यात पावसाने घेतलेली उसंत आणि ऑगस्ट महिन्यातील पावसाची मोठी तूट यामुळे खरीप पिके पूर्णपणे धोक्यात आली आहेत.अश्यातच राज्यात दुष्काळ जाहीर करावा,अशी मागणी विविध स्तरावरून केली जात असतांनाच महाराष्ट्रात कोरडा दुष्काळ जाहीर करण्याच्या शासकीय हालचालींना वेग आला आहे.या पार्श्वभूमीवर राज्य सरकारने दुष्काळ निश्चितीसाठीची पहिली पायरी म्हणजेच पहिला ट्रिगर लागू केला आहे.सध्या क्षेत्रीय पातळीवर जिथे पावसाची मोठी तूट आहे अश्या ठिकाणी सर्वप्रथम प्रक्रिया सुरू करण्यात आली आहे.विशेषतः महाराष्ट्रातील एकूणच परिस्थिती पाहता मराठवाडा येथील अहवाल प्राधान्याने मागवला असल्याची माहिती आहे.तर दुसरी पायरी लागू करण्यासाठी आता उपग्रहाद्वारे मिळणारा डेटा, जमिनीतील ओलावा,जलाशयांमधील उपलब्ध पाणीसाठा आणि प्रत्यक्ष पिकांची स्थिती तपासली जात आहे.राज्याचे मुख्यमंत्री देवेंद्र फडणवीस आणि कृषीमंत्री दत्तात्रय भरणे यांनी नुकसान भरपाईसाठी प्रशासनाला तातडीने पंचनामे पूर्ण करण्याचे निर्देश दिले आहेत.