उद्रेक न्युज वृत्त
देसाईगंज(गडचिरोली) :-मुख्यमंत्री माझी लाडकी बहीण योजनेतील कागदपत्रांच्या अटी शिथिल झाल्या असल्या तरी,या योजनेतील लाडक्या बहिणी काही कुणाचे ऐकण्याच्या मनःस्थितीत नाहीत. कागदपत्रांसाठी त्यांची धावपळ सुरूच आहे.योग्य मार्गदर्शनाअभावी त्यांचा वेळ व पैसा वाया जात आहे. खरीप हंगामातील शेतीच्या कामाकडे पाठ फिरवून त्या कागदपत्र व अर्ज भरण्यासाठी भटकत असून, शेतकऱ्यांना मजुरांकरिता प्रतीक्षा करावी लागत आहे.
जिल्ह्यात अद्याप धुवाधार पाऊस नसला तरी, आतापर्यंत आलेल्या पावसामुळे शेतशिवार हिरवेगार झाले आहे.त्यातच सिंचन क्षेत्रात रोवणीला वेग आला आहे.यासाठी महिला मजुरांची गरज पडत आहे.ऐन शेती कामाच्या हंगामात राज्य शासनाने मुख्यमंत्री माझी लाडकी बहीण योजनेची घोषणा केली.योजने अंतर्गत महिन्याला दीड हजार रुपये खात्यात जमा होणार असल्याने या योजनेच्या लाभाकरिता अर्ज भरण्यासाठी धडपड सुरू आहे.याकरिता आवश्यक कागदपत्र मिळविण्यासाठी सध्या दाही दिशा भटकंती सुरू आहे.त्यामुळे सध्या शेतकऱ्यांना महिला मजूर बांधावर येण्यासाठी वाट पहावी लागत आहे.
