हॉटेलचा नाश्ता महागणार; व्यवसायिक सिलेंडरच्या दरात सर्वात मोठी वाढ.. – सर्वसामान्यांच्याच खिशाला कात्री..

उद्रेक न्युज वृत्त :-महिन्याच्या सुरुवातीलाच कमर्शियल म्हणजेच व्यवसायिक गॅस सिलेंडरच्या दरात मोठी वाढ करण्यात आली आहे.आज,शुक्रवार १ मे रोजी १९ किलोच्या व्यवसायिक सिलेंडरच्या किंमतीत तब्बल ९९३ रुपयांची वाढ करण्यात आली आहे.मात्र,घरगुती वापराच्या १४.२ किलोच्या एलपीजी सिलेंडरच्या दरात कोणतीही वाढ करण्यात आलेली नाही.सध्या घरगुती गॅस सिलेंडरचे दर स्थिर ठेवण्यात आले असले तरी व्यावसायिक गॅसच्या दरवाढीचा अप्रत्यक्ष परिणाम सामान्य नागरिकांच्या खिशावर होण्याची शक्यता आहे.व्यवसायिक गॅस महागल्याने हॉटेल,ढाबे,रेस्टॉरंट आणि कॅटरिंग सेवांचा खर्च वाढणार आहे.परिणामी, बाहेरचे जेवण,चहा-नाश्ता,थाळी यांचे दर दहा ते पंधरा टक्क्यांनी वाढण्याची शक्यता वर्तवली जात आहे. याशिवाय मिठाई दुकाने,बेकरी आणि लघुउद्योगांनाही फटका बसणार असून यामुळे उत्पादन खर्च वाढेल आणि हॉटेल व खाद्य व्यवसायातील वाढलेला खर्च शेवटी ग्राहकांकडूनच वसूल केला जाणार आहे.विशेष म्हणजे, अवघ्या एका महिन्यात जवळपास हजार रुपयांची वाढ झाली आहे.व्यवसायिक गॅस सिलेंडर मुंबईत कालपर्यंत २०३१.५० रुपये होता,तर आता ३०२४.५० रुपये झाला आहे.नागपुरात सिलेंडरची किंमत ३१२०.५० रुपये झाली आहे.या दरवाढीमुळे खाद्य व्यवसाय चालवणाऱ्यांचा खर्च मोठ्या प्रमाणात वाढणार आहे आणि त्याचा भुर्दंड सर्वसामान्य नागरिकांनाच सोसावा लागणार आहे.