तीन दिवसांपासून बेपत्ता इसमाचा मृतदेह आढळला नदीपात्रात…

भंडारा :-एका कारखान्यात कामावर असणारा ३५ वर्षीय इसम कुणालाही न सांगता कारखान्यामधून निघून गेला.त्यातच कारखान्यातील कामगारांनी शोध घेऊनही मिळाला नसल्याने पोलिसांत तक्रार दाखल केली. अशातच तीन दिवसांपासून बेपत्ता असलेल्या इसमाचा मृतदेह चुलबंद नदीपात्रात आज,गुरुवारी २३ जानेवारीला दुपारी १२ वाजताच्या सुमारास मिळून आल्याने परिसरात एकच खळबळ उडाली.देविदास दादाजी गुरुनुले वय ३५ वर्षे रा.बाळापुर(तळोधी) ता.नागभीड जि.चंद्रपूर असे नदीपात्रात आढळून आलेल्या कामगाराचे नाव आहे.माहितीनुसार,देविदास गुरुनुले हा कामगार म्हणून भंडारा जिल्ह्याच्या लाखांदूर येथील नॅचरल ग्रोवर्स साखर कारखान्यामध्ये बऱ्याच कालावधीपासून कामावर होता.तीन दिवसांपूर्वी म्हणजेच रविवार दिनांक-१९ जानेवारीला देविदास हा नेहमी प्रमाणे रात्र पाळीत कामावर होता.अशातच देविदास हा त्याच रात्री कारखान्यामधून रात्रीच्या वेळेस निघून गेला.बराच वेळ होऊनही कारखान्यात परतला नसल्याने कारखान्यातील कामगारांनी त्याचा शोध घेतला.शोध घेऊनही देविदासचा थांगपत्ता लागेनासा झाल्याने कामगारांनी लाखांदूर पोलीस ठाणे गाठून तक्रार दाखल केली.तक्रार दाखल होताच पोलिसांनी देविदासचा शोध घेणे सुरू केले.अशातच आज,गुरुवारी दुपारच्या सुमारास काही नागरिकांना लाखांदूर तालुक्याच्या चुलबंद नदीपात्रात मृतदेह असल्याचे दिसून आले.त्यानुसार सदर घटनेची माहिती लाखांदूर पोलीस प्रशासनास देण्यात आली. घटनास्थळी पोलीस ठाण्याचे पोलिस निरीक्षक सचिन पवार,उपनिरीक्षक परमेश्वर आगाशे,पोलिस हवालदार गोपाल कोसरे,दिनेश बोरकर,पोलिस नाईक सुभाष सहारे,भूपेश बावनकुळे,दीपक घुले व सुधाकर ढोरे घटनास्थळी दाखल होत मृतदेह उत्तरीय तपासणीसाठी लाखांदूर रुग्णालयात दाखल केला. घटनेचा पुढील तपास लाखांदूर पोलीस प्रशासन करीत आहे.