अन्न व औषध प्रशासन विभागाचा छापा; मोठा औषध साठा जप्त..

भंडारा :-कोणत्याही वैज्ञानिक आधाराशिवाय खोटे दावे करणे आणि जाहिरात करून औषध विकणे कायद्यानुसार गंभीर गुन्हा असूनही काहीजण आक्षेपार्ह जाहिराती तसेच निकृष्ट दर्जाची औषधे उत्पादित करून नागरिकांच्या आरोग्याशी खेळ करू लागलेत.अश्याच प्रकारे गंभीर आजार बरे करण्याचे खोटे दावे आणि दिशाभूल करणाऱ्या जाहिराती प्रसिद्ध करून नियमांचे उल्लंघन करणाऱ्या दोन औषध प्रतिष्ठानांवर भंडारा शहरात अन्न व औषध प्रशासनाने मोठी कारवाई केली आहे.सदरची कारवाई औषध निरीक्षक व सहाय्यक आयुक्त,अन्न व औषध प्रशासन,भंडारा यांच्या पथकाने बुधवार ३ जून २०२६ रोजी केली असून कारवाईत २९ हजार ७९२ रुपये किंमतीचा आक्षेपार्ह औषध साठा जप्त करण्यात आला आहे. ‘औषधे व जादूटोणादी उपाय (आक्षेपार्ह जाहिरात)कायदा,१९५४’ चे उल्लंघन केल्याप्रकरणी सदरची कारवाई करण्यात आली आहे.

भंडारा शहरातील राम मंदिर रोड,बडा बाजार येथील

मे.श्री लक्ष्मी आयुर्वेद औषधालय आणि राजीव गांधी चौक येथील पतंजली चिकित्सालय व औषधी भंडार स्टोअर्स(मे.अविशा इंटरप्राईजेस)या दोन प्रतिष्ठानांवर छापा टाकण्यात आला.तपासणीदरम्यान,विक्रीसाठी उपलब्ध असलेल्या एकूण १५ औषधांवर आक्षेपार्ह मजकूर आणि जाहिरात आढळून आली.पहिल्या प्रतिष्ठानातून १२ हजार १८० रुपयांचा,तर दुसऱ्या पतंजली प्रतिष्ठानातून १७ हजार ६१२ रुपयांचा औषध साठा कायदेशीर पंचनामा करून जप्त करण्यात आला.जप्त करण्यात आलेल्या औषधांच्या वेष्टनावर मधुमेह,हृदयरोग,लठ्ठपणा,नेत्ररोग,गलगंड,महिला व पुरुषांमधील लैंगिक समस्या आणि वजन कमी करणे यांसारख्या गंभीर आजारांवर त्वरित गुण येईल,असा मजकूर छापण्यात आला होता.जप्त केलेल्या औषधांमध्ये पतंजलीचे कारेला जामुन ज्यूस,दृष्टी आय ड्रॉप्स,आय ग्रीट आय ड्रॉप्स,हृदयम्रीत वटी,कांचनार घनवटी यांसह शक्तीपुंज टॅबलेट्स,श्वेत प्रदरान्तक कॅप्सूल आणि सुंदरी सुधा सिरप यांसारख्या १५ औषधांचा समावेश आहे.