म्हशीच्या पिल्लाची बिबट्याने केली शिकार..

भंडारा :-हल्ली वाघांसह बिबट्याच्या हल्ल्याचे प्रमाण वाढले आहे.जंगलातील प्राण्यांसह बिबट्या गावात मुसंडी मारून पाळीव प्राण्यांची शिकार करू लागला आहे.अशातच गावात येऊन गोठ्यात बांधलेल्या शेळ्या,बोकड व इतर पशूंना भक्ष करू लागल्याने गावातील नागरिक भयभीत झाले आहेत.अश्याच प्रकारे भंडारा जिल्ह्याच्या पालोरा वनविभाग कार्यालय शेजारील लवंकुश महादेव कुकडे यांच्या घराच्या गोठ्यात बांधलेल्या म्हशीच्या पिल्लाची (वघार) बिबट्याने शिकार केली आहे.बिबट्याने वासराला दोरखंडा सह १०० मीटर अंतरावर फरफटत नेले असल्याची घटना काल,शनिवारी १८ जानेवारी रोजी पालोरा येथे उघडकीस आल्याने ग्रामस्थ भयभीत झाले आहेत.पशुपालक लवंकुश कुकडे यांनी नेहमीप्रमाणे आपली जनावरे घरातील गोठ्यात बांधली होती.कुकडे कुटुंबीय पहाटे झोपेतून जागे झाले.गोठ्यातील वघार न दिसल्यामुळे त्यांनी शोधाशोध केली.शोधाशोध केल्यानंतर वघार घरापासून १०० मीटर अंतरावर आढळून आल्याने सदरची घटना उघडकीस आली.सदर घटनेची माहती वनविभागाला दिली गेली.त्यानुसार तुमसरचे वनपरिक्षेत्र अधिकारी सी.जी.रहांगडाले,क्षेत्र सहायक अस्लाम शेख यांनी घटनास्थळाचा पंचनामा केला. सदर घटनेने गावकरी बिबट्याच्या दहशतीत सोडण्यापूर्वी बिबट्याचा तात्काळ बंदोबस्त करावा; अशी मागणी नागरिकांकडून केली जात आहे.