देसाईगंज तालुक्यातील हत्तींचा कळप आरमोरी तालुक्यात दाखल..

आरमोरी(गडचिरोली):-मागील काही दिवसांपासून देसाईगंज तालुक्याच्या विहीरगाव, डोंगरगाव व पिंपळगाव परिसरात वास्तव्यास असणाऱ्या जंगली हत्तींनी आता आरमोरी तालुक्यात दाखल होत पळसगांव,मंजेवाडा,शंकरनगर व परीसरातील शेतकऱ्यांचे मोठे नुकसान केले आहे. देसाईगंज तालुक्यातील शेतकऱ्यांचे नुकसान केल्यानंतर आता आरमोरी तालुक्यात जंगली हत्तींनी हैदोस माजविला आहे.जंगली हत्तींनी देसाईगंज तालुक्याच्या डोंगरगाव (हलबी)मार्गाने आरमोरीच्या पळसगांव परिसरात दाखल होत शेतकऱ्यांचे धान,भाजीपाला व साहित्यांची मोठ्या प्रमाणात नासधूस केली आहे.हत्तींच्या कळपात जवळपास २८ हत्तींचा काफिला असल्याची माहिती आहे.अश्यातच नुकतेच २६ मे रोजी हत्तींच्या हालचालींवर सतत लक्ष ठेवण्यासाठी आणि  संभाव्य धोका टाळण्यासाठी हत्तींना कॉलर आयडी लावण्याचे व हत्ती नागरी वस्ती पासून पाच किलोमीटरच्या परिसरात आल्यास नोंदणीकृत मोबाईल क्रमांकावर वेळीच इशारा देण्यासाठी ‘अलर्ट ॲप’ तयार करण्याच्या सूचना जिल्हाधिकारी यांनी दिल्या आहेत.यासोबतच त्यांच्यावर लक्ष ठेवण्यासाठी जागोजागी टेहळणी बुरुज (वाॅचटावर) उभारून सुरक्षारक्षक नियुक्त करण्याचे त्यांनी निर्देश दिले आहेत.