दागिने लंपास करणाऱ्या चोरट्या महिलेचे आरमोरी पोलिसांकडून स्केच छायाचित्र जारी

आरमोरी(गडचिरोली):-आरमोरी शहराच्या नवीन बसस्थानकावर मागील आठवड्यात एका अज्ञात चोरट्या महिलेने गर्दीचा फायदा घेत दोन महिलांच्या पर्स मधून तब्बल ८ लाख ६४ हजार ५०० रुपयांचे दागिने लंपास केल्याची घटना उघडकीस आल्याने प्रवाशांमध्ये एकच खळबळ उडाली आहे.प्रकरणी अज्ञात महीलेविरोधात आरमोरी पोलिस ठाण्यात गुन्हा दाखल होताच पोलिसांनी संशयित महिला आरोपीचा स्केच छायाचित्र जारी केला आहे.घटनेच्या वेळी संशयित महिला ही पाच फूट उंच,सावळ्या रंगाची,जिन्स पॅन्ट व टॉप परिधान केलेली होती,तसेच तिच्या चेहऱ्यावर मुरूम असल्याची माहिती फिर्यादी महिलांनी पोलिसांना दिली आहे.सदर आरोपी महिला कुठेही आढळून आल्यास तात्काळ आरमोरी पोलिसांशी संपर्क साधण्याचे आवाहन ठाण्याच्या वतीने करण्यात आले आहे. माहितीनुसार,आरमोरी येथील रहिवासी लता वामन जुवारे ही आरमोरी शहरातील नवीन बसस्थानकावर ब्रम्हपुरीला जाण्यासाठी बसची वाट पाहत होती.तर नागपूर येथील रहिवासी २९ वर्षीय निधी रूपेश शेंडे ही नागपूरला जाण्यासाठी आरमोरी येथे बसची वाट पाहत होती.यादरम्यान अज्ञात महिला आरोपीने लता जुवारे यांचे ५ लाख ८८ हजार किंमतीचे ८४ ग्रॅम दागिने लंपास केले,तर निधी शेंडे यांच्या बॅगेतून २ लाख ७६ हजार ५०० रुपये किंमतीचे ३९.०५ ग्रॅम वजनाचे सोन्याचे दागिने लंपास केले.प्रकरणी आरमोरी पोलिसांकडून आरोपी महिलेचा तपास सुरू होता.मात्र,आरोपी महिलेचा कुठेही थांगपत्ता न लागल्याने अखेर पोलिसांना आरोपीचे स्केच छायाचित्र जारी करावे लागले असून त्या दिशेने तपास सुरू केला आहे.