सिने अभिनेत्री रविना टंडन जंगल सफारीचा आनंद लुटण्यासाठी बल्लारपूर-कारवा पर्यटन क्षेत्रात..

चंद्रपूर :-हिंदी चित्रपट सृष्टीतील प्रसिद्ध सिने अभिनेत्री रविना टंडन या नुकत्याच चंद्रपूर जिल्ह्यात पर्यटन सफारीचा आनंद लुटण्यासाठी आल्या असून काल, रविवार १६ फेब्रुवारीला राज्याचे माजी वनमंत्री तथा बल्लारपूरचे आमदार सुधीर मुनगंटीवार यांच्या समवेत बल्लारपूर-कारवा वनपरिक्षेत्रातील पर्यटन सफारी करीत जंगल सफारीचा आनंद लुटला.चंद्रपूर जिल्ह्यात केवळ ताडोबा नव्हे,तर इतर वनक्षेत्रातदेखील वाघांचा वावर मोठ्या प्रमाणात आहे. सोबत बिबट,अस्वल, राणकुत्रे, रानगवा,हरण,चितळ, सांबर,रानमांजर यांची संख्या मोठ्या प्रमाणात आहे.मात्र,इतर वनविभागात वनपर्यटनाची सुविधा उपलब्ध नसल्याने ताडोबामध्ये पर्यटक सफारीचा आनंद लुटण्यासाठी येत असतात. त्यातच बॉलिवूड सह क्रिकेटर व इतर मोठ-मोठ्या सेलिब्रिटिंची पर्यटनासाठी रेलचेल असते.अशातच मध्यचांदा वनविभागाने बल्लारपूर-कारवा या क्षेत्रात आगळीवेगळी अशी पर्यटन सफारी सुरू केली आहे. राज्याचे माजी वनमंत्री तथा बल्लारपूरचे आमदार सुधीर मुनगंटीवार यांनी प्रसिद्ध सिने अभिनेत्री रविना टंडन यांना बल्लारपूर वनपरिक्षेत्रातील कारवा येथे जंगल सफारी घडविली.जंगल पर्यटन करत असतांना, त्यांना इरिना वाघिणीचे दर्शन घडले.व्याघ्र दर्शनाने त्या चांगल्याच सुखावल्या.त्यांना प्रत्यक्ष व्याघ्र दर्शन घडल्याने जंगल सफारी यशस्वी झाल्याचे समाधान व्यक्त केले.जंगल पर्यटन झाल्यावर त्यांनी वाघाबाबतची माहिती वन अधिकारी यांचेकडून जाणून घेतली.