जंगल परिसरात मृतावस्थेत आढळून आला वाघ.. – मृत वाघाच्या तोंडावर,मानेवर व मागील पायाला जखमा..

भंडारा :-गुरे चराईसाठी जंगल परिसरात गेलेल्या गुराख्यास वाघ मृतावस्थेत दिसून आल्याने त्याने याबाबतची माहिती वनपरिक्षेत्र अधिकारी यांना दिली. वनपरिक्षेत्र अधिकारी पथकासह घटनास्थळी दाखल होत पाहणी केली असता मृत वाघ हा नर असून त्याचे वय अंदाजे ४ ते ५ वर्षे असल्याचे निदर्शनास आले. मृत वाघाच्या तोंडावर,मानेवर व मागील पायाला जखमा असल्याचे दिसून आले.तसेच मृत वाघाचे सर्व अवयव शाबूत असल्याचे देखील निदर्शनास आले. सदरची घटना ही भंडारा वन विभाग अंतर्गत येणाऱ्या नाकाडोंगरी वनक्षेत्रातील सहवनक्षेत्र कवलेवाडा नियतक्षेत्र सीतासावंगी कक्ष क्रमांक-६५ मधील असून आज,सोमवार १७ फेब्रुवारीला सायंकाळी साडे चार वाजेच्या सुमारास उघडकीस आली.सदर मृत वाघाचे शव वनाधिकारी यांनी ताब्यात घेतले असून,सूर्यास्त झाला असल्याने पशुवैद्यकीय अधिकारी यांचा समावेश असलेल्या चमूमार्फ़त उद्या १८ फेब्रुवारीला सकाळी मृत वाघाचे शवविच्छेदन करण्यात येणार असल्याचे वन विभागाच्या वतीने स्पष्ट करण्यात आले आहे.सदर मृत वाघाच्या शरीरावर असलेल्या जखामांवरून वाघाचा झुंजीत मृत्यू झाला असावा, असा अंदाज वर्तविण्यात येत आहे.वाघाचे मृत्यू कशामुळे झाले हे उद्याला शवविच्छेदन अहवालात स्पष्ट होणार असल्याचे वनाधिकाऱ्यांनी म्हटले आहे.