मोठी बातमी.. आरमोरी शहरातील होंडा शोरुमच्या इमारतीची भिंत कोसळून तिघांचा मृत्यू तर तिघे गंभीर जखमी.. – मृतांमध्ये देसाईगंज शहरातील दोघे तर एकजण ब्रम्हपुरी तालुक्यातील..

आरमोरी(गडचिरोली):-गडचिरोली जिल्ह्याच्या  आरमोरी शहरातील मुख्य मार्गावरील पंचायत समितीच्या बाजूला असलेल्या प्रसिद्ध लालानी मोटर्स होंडा शोरुमच्या इमारतीची भिंत कोसळून मलब्याच्या ढिगाऱ्याखाली दबून तिघांचा घटनास्थळीच मृत्यू झाला,तर तिघेजण गंभीर जखमी झाल्याची दुर्दैवी

घटना आज,शुक्रवार ८ ऑगस्ट रोजी सायंकाळी ५ वाजेच्या दरम्यान घडली.घटनेत अफसान शेख वय ३२ वर्षे व तहसीन इस्राईन शेख वय ३० वर्षे,दोघेही रा.देसाईगंज,जि.गडचिरोली येथील रहिवासी असून आकाश ज्ञानेश्वर बुराडे वय २५ वर्षे रा.निलज,ब्रम्हपुरी, जि.चंद्रपूर अशी तिन्ही मृतांची नावे आहेत.तर गंभीर जखमींमध्ये दिपक मेश्राम वय २३ वर्षे व विलास मने वय ५० वर्षे,दोघेही आरमोरी येथील रहिवासी असून सौरभ चौधरी वय २५ वर्षे रा.मेंडकी,ता.ब्रम्हपुरी,

जि.चंद्रपूर अशी गंभीर जखमींची नावे असून तिघांचीही हाडे तुटल्याची प्राथमिक माहिती आहे. तिन्ही जखमींवर आरमोरी उपजिल्हा रुग्णालयात प्राथमिक उपचार करून त्यांना गडचिरोली जिल्हा सामान्य रुग्णालयात भरती करण्यात आले आहे.

आरमोरी शहरातील लालानी मोटर्स होंडा शोरुम जिल्ह्यात प्रसिद्ध आहे.सदर शोरुममध्ये परिसरातील  तसेच इतर ठिकाणाहून नागरिक दुचाकी वाहन खरेदी करण्याकरीता जात असतात.अश्यातच आज,शुक्रवार सायंकाळच्या सुमारास शोरुमध्ये काही नागरिक असतांनाच अचानकपणे क्षणात शोरुमच्या इमारतीची भिंत कोसळली.आतमध्ये असलेले सहा नागरिक इमारतीच्या मलब्याच्या ढिगाऱ्याखाली दबल्या गेले.भिंत कोसळतच शहरातील नागरिकांनी घटनास्थळी धाव घेत मलब्याच्या ढिगाऱ्याखाली दबल्या गेलेल्यांना बाहेर काढण्याचा प्रयत्न केला असता तिघांचा घटनास्थळीच मृत्यू झाला होता,तर तिघेजण गंभीर जखमी असल्याने त्यांना आरमोरी शहरातील उपजिल्हा रुग्णालयात तात्काळ उपचारार्थ दाखल केले.त्यानंतर तिघांनाही गडचिरोली जिल्हा सामान्य रुग्णालयात पुढील उपचाराकरिता हलविण्यात आले.घटनेने परिसरात हळहळ व्यक्त केली जात आहे.