नराधम बापाचा आपल्याच मुलीवर अत्याचार; आरोपी अटकेत..

चंद्रपूर :-एका ३७ वर्षीय नराधम बापाने आपल्याच १४ वर्षीय अल्पवयीन मुलीवर अत्याचार केल्याची घृणास्पद घटना चंद्रपूर जिल्ह्याच्या गोंडपिपरी तालुक्यात उघडकीस आल्याने सर्वत्र संतापाची लाट उसळली असून घटनेचा सर्वच स्तरांतून तीव्र निषेध करण्यात येत आहे व दोषीवर कठोरात-कठोर कारवाई करण्याची मागणी नागरिकांकडून करण्यात येत आहे.पीडित अल्पवयीन मुलगी इयत्ता नववीत शिक्षण घेत आहे.आरोपी वडिल दारूच्या आहारी गेल्याने घरी सततची किरकिरी करून नेहमी वाद घालायचा.यामुळे मुलीची आई कंटाळली होती. नवऱ्याच्या त्रासापायी तीन महिन्यांपूर्वी मुलगा व मुलगी यांना घेऊन राजुरा येथे माहेरी गेली होती.मात्र, मुलीची परीक्षा असल्याने वडिलाने तिला गावी आणले आणि मुलीवर अत्याचार केला.दुसऱ्या दिवशी म्हणजेच बुधवार ८ एप्रिल २०२६ रोजी शाळेत परीक्षा देण्यासाठी गेलेल्या मुलीच्या बॅगेत कपडे आढळल्याने शिक्षकांना संशय आला.त्यांनी चौकशी केली असता मुलगी भावनिक होऊन रडू लागली आणि तिने घडलेला सर्व प्रकार शिक्षकांना सांगितला.प्रकरणाचे गांभीर्य लक्षात घेता शिक्षकांनी तात्काळ गावातील पोलिस पाटील यांना माहिती दिली.त्यानंतर,पोलिस ठाण्याशी संपर्क साधण्यात आला.पोलिसांनी शाळेत जाऊन मुलीची सविस्तर चौकशी केली व तिच्या जबाबाच्या आधारे तातडीने कारवाई केली.पीडित मुलीची चंद्रपूर येथे वैद्यकीय तपासणी करण्यात आली असून अहवालानंतर आरोपीला त्याच्या राहत्या घरातून अटक करून पोलिस कोठडीत रवानगी करण्यात आली आहे.