धान घोटाळा प्रकरणातील निलंबित सहाय्यक सचिव सेवेतून बडतर्फ..

भंडारा :-जिल्ह्याच्या लाखांदूर कृषी उत्पन्न बाजार समितीमध्ये गाजलेल्या धान घोटाळा आणि प्रशासकीय अनियमिततेप्रकरणी गेल्या अनेक महिन्यांपासून निलंबित असलेले सहायक सचिव श्रीकांत दोनाडकर यांना सेवेतून बडतर्फ करण्याचा प्रस्ताव संचालक मंडळाच्या सभेत मंजूर करण्यात आला.लाखांदूर बाजार समितीमध्ये २०२१-२२ आणि २०२२-२३ या वर्षांमध्ये शासनाच्या किमान आधारभूत किंमत योजनेंतर्गत धान खरेदी केंद्र चालवण्यात आले होते.या केंद्रावर कोट्यवधी रुपयांचा धान घोटाळा झाल्याचा आरोप विद्यमान संचालक मंडळाने केला होता.या घोटाळ्या प्रकरणी पणन विभागाकडे तक्रार करून दोषींवर कारवाईची मागणी करण्यात आली होती.शासनाने केलेल्या लेखापरीक्षण अहवालात या केंद्रावर मोठ्या प्रमाणात गैरव्यवहार झाल्याचे आणि बाजार समितीच्या दैनंदिन कामकाजातही अनियमितता असल्याचे सिद्ध झाले होते. लेखापरीक्षण अहवालातील गंभीर ताशेऱ्यांनंतर संचालक मंडळाने काही महिन्यांपूर्वी सहाय्यक सचिव दोनाडकर यांना निलंबित केले होते.या प्रकरणाची व्याप्ती मोठी असल्याने तत्कालीन प्रशासक आणि सहाय्यक सचिवांविरुद्ध फौजदारी गुन्हा दाखल करण्यासाठी पोलिसात तक्रारही करण्यात आली होती.अखेर समितीच्या प्रतिमेला तडा गेल्याचे आणि आर्थिक नुकसान झाल्याचे कारण देत दोनाडकर यांना कायमचा घरचा रस्ता दाखविण्यात आला म्हणजेच नोकरीतून कायमचे काढण्यात आले आहे.