महिना लोटूनही तरुणीच्या मृत्यूचे कारण गुलदस्त्यात..

गोंदिया :-जिल्ह्याच्या देवरी तालुक्यातील हरदोली गावातून २३ डिसेंबर २०२५ पासून बेपत्ता असलेल्या तरुणीचा मृतदेह सालेकसा तालुक्याच्या पुजारीटोला धरणात आढळला होता.कल्पना तेजराम भोयर वय २३ वर्षे,रा.हरदोली,ता.देवरी, जि.गोंदिया असे मृत मुलीचे नाव आहे.घरातून बेपत्ता झाल्यानंतर घरच्या मंडळींनी गावासह नातेवाईकाकडे शोध घेतला,परंतु ती कुठेच सापडली नाही.याची तक्रार फिर्यादी वडील तेजराम भोयर यांनी २४ डिसेंबर २०२५ रोजी पोलिसात तक्रार दाखल करण्यासाठी गेले असता पोलिसांनी तक्रार घेतली नाही.त्यातच कल्पनाचा मृतदेह २८ डिसेंबर २०२५ रोजी धरणात आढळला होता.पोलिसांनी तंटामुक्त समितीच्या व पोलिस जमादार यांच्या समक्ष पंचनामा करून ग्रामीण रुग्णालय येथे उत्तरीय तपासणी करण्यात आली होती. मात्र,आज महिना लोटूनही कल्पनाची हत्या की आत्महत्या?याचा उलगडा अद्यापही झालेला नाही. त्यातच,पोलीस विभागाकडून प्रकरणाचा तपास सुरू आहे व तपास झाल्यावर नक्कीच नियमानुसार कारवाई केली जाईल,अशी बतावणी करून हातवर केले जात असल्याने गरिबांच्या प्रकरणात चालढकल केली जात असल्याचे सदर प्रकारावरून दिसून येत आहे.