आता भेसळयुक्त आणि दूषित अन्नाची एकाच तक्रारीवर होणार कारवाई..

उद्रेक न्युज वृत्त :-भारतीय अन्न सुरक्षा आणि मानक प्राधिकरण म्हणजेच एफएसएसएआयने भेसळयुक्त आणि दूषित अन्नावर कारवाई करण्यासाठी ‘फूड सेफ्टी कनेक्ट’ ॲप सुरू केले आहे.या ॲपद्वारे,लोक थेट अन्न सुरक्षा विभागाकडे दूषित किंवा भेसळयुक्त अन्नाची तक्रार करू शकतात.बऱ्याच ठिकाणी खुले खाद्य तेल विक्री करण्यात येते.खुल्या तेलात पामतेल,खनिज तेल किंवा इतर स्वस्त व आरोग्यास अपायकारक पदार्थाची भेसळ होण्याची शक्यता अधिक असल्याने त्याच्या विक्रीवर बंदी आहे.अन्न सुरक्षा नियमांनुसार खाद्यतेलाच्या पॅकिंगवर ब्रँडचे नाव,उत्पादकाचा पत्ता,बेंच क्रमांक, पॅकिंगची तारीख,एफएसएसएआय परवाना क्रमांक आणि वजन नमूद करणे बंधनकारक आहे.तसेच,तेलाची विक्री केवळ शासनाने निश्चित केलेल्या प्रमाणित आकारांमध्येच करता येते.ग्राहकांच्या आरोग्याच्या दृष्टीने पॅकबंद व प्रमाणित खाद्यपदार्थांचा वापर करण्याचे आवाहन अन्न व औषध प्रशासनाने केले.विशेष म्हणजे, ग्राहक रेस्टॉरंट,हॉटेल आणि रस्त्यावरील खाद्यपदार्थांमधील निकृष्ट दर्जाच्या किंवा भेसळयुक्त अन्नाची माहिती फोटोंसह अपलोड करू शकतात.एफएसएसएआयच्या मते,देशातील प्रत्येक नागरिकाला कोणत्याही भेसळीशिवाय स्वच्छ,ताजे अन्न मिळावे,हे सुनिश्चित करण्यासाठी ‘फूड सेफ्टी कनेक्ट’ ॲप सुरू करण्यात आले आहे.