उल्लेखनीय कामगिरी करणाऱ्या बालकांना मिळणार राष्ट्रीय स्तरावरील गौरव.. प्रधानमंत्री राष्ट्रीय बाल पुरस्कारासाठी अर्ज करण्याचे आवाहन..

गडचिरोली :-केंद्र शासनाच्या महिला व बालविकास विभागामार्फत सन-२०२७ साठी दिल्या जाणाऱ्या ‘प्रधानमंत्री राष्ट्रीय बाल पुरस्कार’साठी अर्ज मागविण्यात आले आहेत.शिक्षण,कला,सांस्कृतिक कार्य,क्रीडा, नाविन्यपूर्ण शोध,सामाजिक कार्य तसेच शौर्य अशा विविध क्षेत्रांत विशेष नैपुण्यपूर्ण व उल्लेखनीय कामगिरी करणाऱ्या बालकांना ‘बाल शक्ती पुरस्कार’ प्रदान करण्यात येणार आहे.याशिवाय बालकांच्या संरक्षण, विकास व कल्याणासाठी निस्वार्थपणे कार्य करणाऱ्या व्यक्ती व संस्थांनाही ‘बाल कल्याण पुरस्कार’ देण्यात येणार आहेत.

बाल शक्ती पुरस्कारासाठी अर्ज करणाऱ्या बालकांचे वय ५ ते १८ वर्षांदरम्यान असणे आवश्यक आहे. संबंधित बालकाने शिक्षण,कला,क्रीडा,सांस्कृतिक क्षेत्र, सामाजिक कार्य,संशोधन अथवा शौर्य अशा क्षेत्रांत उल्लेखनीय व प्रेरणादायी कार्य केलेले असावे.उत्कृष्ट कार्य करणाऱ्या बालकांना राष्ट्रीय स्तरावर गौरविण्याच्या उद्देशाने हा पुरस्कार दिला जातो.

बाल कल्याण पुरस्कारांतर्गत वैयक्तिक पुरस्कारासाठी अशा व्यक्ती पात्र राहतील,ज्यांनी बालकांच्या विकास, संरक्षण व कल्याण क्षेत्रात कोणतेही वेतन किंवा मानधन न घेता उदात्त भावनेतून किमान सात वर्षे सातत्यपूर्ण कार्य केलेले आहे.तसेच संस्थास्तरावरील पुरस्कारासाठी बाल कल्याण क्षेत्रात अपवादात्मक व उत्कृष्ट काम करणाऱ्या संस्थांची निवड करण्यात येणार आहे.संबंधित संस्था पूर्णपणे शासकीय निधीवर अवलंबून नसावी आणि बाल कल्याण क्षेत्रात किमान दहा वर्षे सातत्यपूर्ण कार्य केलेले असावे.

केंद्र शासनाच्या मार्गदर्शक सूचनांनुसार या पुरस्कारांसाठी नामनिर्देशन प्रक्रिया पूर्णपणे ऑनलाईन पद्धतीने राबविण्यात येणार आहे. नामनिर्देशनासाठी अर्ज केवळ [राष्ट्रीय पुरस्कार संकेतस्थळ](https://awards.gov.in?utm_source=chatgpt.com)या संकेतस्थळावरूनच स्वीकारले जातील. संकेतस्थळाव्यतिरिक्त प्राप्त होणारे अर्ज ग्राह्य धरले जाणार नाहीत.

सन-२०२७ मध्ये प्रदान करण्यात येणाऱ्या पुरस्कारांसाठी १ एप्रिल २०२६ ते ३१ जुलै २०२६ या कालावधीत ऑनलाईन अर्ज सादर करता येणार आहेत.विहित मुदतीत प्राप्त झालेले अर्ज राज्य शासन,केंद्रशासित प्रदेश प्रशासन,जिल्हाधिकारी,जिल्हा न्यायाधीश तसेच संबंधित शासन अथवा अधिकृत संस्थांकडून पडताळणीसाठी पाठविण्यात येणार असून त्यानंतर पात्रतेनुसार छाननी प्रक्रिया पार पाडण्यात येईल.त्या-त्या जिल्ह्यातील पात्र बालकांनी,व्यक्तींनी तसेच संस्थांनी या राष्ट्रीय पुरस्कारासाठी ३१ जुलै २०२६ पूर्वी ऑनलाईन अर्ज सादर करावेत,असे आवाहन जिल्हा महिला व बाल विकास अधिकारी ज्योती कडू यांनी केले आहे.