धावत्या बसमधून खाली कोसळताच दुसऱ्या बसने चिरडले; तरुणीचा दुर्दैवी मृत्यू..

पुणे :-पुण्यातील सिंहगड मार्गावरील माणिकबाग परिसरात आज,सोमवार २४ ऑगस्ट रोजी सकाळी दहा वाजेच्या सुमारास भीषण अपघाताची घटना घडली. खानापूर-स्वारगेट मार्गावरील धावत्या पुणे महानगर परिवहन महामंडळाच्या(पीएमपी)बसच्या सोरील दरवाजातून खाली पडून एका २५ वर्षीय विद्यार्थिनीचा दुर्दैवी मृत्यू झाला.विशेष म्हणजे,बसमधून खाली कोसळताच ही तरुणी जवळूनच जाणाऱ्या एका स्कूल बसच्या चाकाखाली आली.त्यामुळे तिचा मृत्यू झाला. कांचन बलवंत खड्डा वय २५ वर्षे,रा.कृष्णा हॉस्टेल, डीआयएटी कॅम्पस,गिरीनगर,खडकवासला,पुणे असे मृत विद्यार्थिनीचे नाव असून ती मूळची राजस्थान येथील रहिवासी आहे.कांचन ही अभियांत्रिकी महाविद्यालयात द्वितीय वर्षात शिक्षण घेत होती.कांचन आज सकाळी खानापूरकडून स्वारगेटच्या दिशेने जाणाऱ्या पीएमपी बसमधून प्रवास करीत होती.बसमध्ये प्रवाशांची मोठी गर्दी असल्याने कांचन पुढील दरवाजाजवळ उभी असतांना तिचा अचानकपणे तोल गेला आणि ती धावत्या बसमधून रस्त्यावर कोसळली.त्याच वेळेस बाजूने जाणाऱ्या स्कूल बसचे चाक तिच्या अंगावरून गेल्याने ती गंभीर जखमी झाली.अपघातानंतर स्थानिकांनी तात्काळ तिला उपचारांसाठी जवळच्या रुग्णालयात दाखल केले.मात्र,डॉक्टरांनी तपासणी अंती तिला मृत घोषित केले.अचानक घडलेल्या प्रसंगाने प्रवाशांमध्ये एकच खळबळ उडाली आहे.