अखेर वैनगंगा नदीत बुडालेल्या ‘त्या’ तीन विद्यार्थ्यांचे सापडले मृतदेह.. – व्हॉलिबॉल खेळतांना गेले होते खोल पाण्यात..

पार्थ जाधव,गोपाल साखरे,स्वप्निल शिरे,पवन सतकार,सुजित देशमुख,शिवम जायभाये,सार्थक पाठक व जुनेद शेख हे गडचिरोली शासकीय वैद्यकीय महाविद्यालयात शिक्षण घेत असून ते वसतिगृहात वास्तव्यास होते.शनिवारी आठही विद्यार्थी चंद्रपूर जिल्ह्याच्या सावली तालुक्यातील व्याहाड (बु.)येथील वैनगंगा नदीपात्रात मौज-मस्तीसह व्हॉलिबॉल खेळत होते.अशातच पाण्यात गेलेला बॉल पकडण्यासाठी पार्थ जाधव धावला.बॉल पुढे व पार्थ मागे धावत होता. बॉलच्या नादात तो खोल पाण्यात बुडाला.त्यानंतर गोपाल साखरे,स्वप्निल शिरे व सुजित देशमुख हे धावले, गोपाल व स्वप्निल पार्थला वाचविण्याच्या प्रयत्नात बुडाले.सुजित देशमुख बचावला.घटनेची माहिती सर्वत्र पसरताच पोलीस ताफ्यासह बचाव यंत्रणा शनिवार पासूनच तिघांच्या शोधात वैनगंगा नदी पात्रात शोध मोहीम राबवित होते.अशातच शनिवारी रात्र झाल्याने शोधमोहीम थांबविण्यात आली व काल रविवारी शोध मोहीमे दरम्यान तिघांचेही मृतदेह डोहातून काढण्यात आले.त्यानंतर तिघांचेही मृतदेह ग्रामीण रुग्णालयात उत्तरीय तपासणी करून  कुटुंबीयांकडे सुपूर्द करण्यात आले.मृतक पार्थ जाधव याच्या कुटुंबाला वैद्यकीय व्यवसायाची पार्श्वभूमी आहे.पार्थचा असा दुर्दैवी मृत्यू झाल्याने जाधव कुटुंबाला मोठा धक्का बसला आहे.तर चिखलीचा मृतक गोपाल साखरे आणि छत्रपती संभाजीनगरचा स्वप्निल शिरे या दोन विद्यार्थ्यांच्या कुटुंबाची परिस्थिती गरिबीची आहे.एमबीबीएस प्रवेश मिळाल्यानंतर आई-वडील व सर्व नातेवाईक आनंदी होते.मात्र,काळाने झडप घालून हा आनंद हिरावून घेतला.