विद्यमान आमदारांच्या पीए व वाहनचालकांच्या मानधनात वाढ..

मुंबई :-राज्याच्या विधानसभा आणि विधान परिषदेच्या विद्यमान आमदारांचे स्वीय सहाय्यक म्हणजेच पीए आणि वाहनचालकांच्या मानधनात दहा हजार रुपयांची वाढ करण्यात आली आहे.सदरची वाढ ही चालू महिन्याच्या १ ऑगस्ट २०२६ पासून लागू करण्यात आल्याचे संसदीय कार्यमंत्री चंद्रकांत पाटील यांनी स्पष्ट केले आहे.राज्य सरकारच्या निर्णयानुसार आता विद्यमान आमदारांच्या पीएंचे मासिक मानधन ३० हजार रुपयांवरून ४० हजार रुपये,तर वाहनचालकांचे मासिक मानधन २० हजार रुपयांवरून ३० हजार रुपये झाले आहे.जवळपास ४ वर्षानंतर सदरची मानधनवाढ करण्यात आली आहे.संसदीय कार्य विभागाने मानधनवाढीबाबतचा शासन निर्णय काल मंगळवारी जारी केला.महाराष्ट्र विधानमंडळ सदस्यांचे वेतन आणि भत्ते अधिनियम,१९५६ मधील तरतुदींनुसार विधानमंडळाच्या विद्यमान सदस्यांना त्यांचे विधिमंडळाचे प्रशासकीय कामकाज अधिक परिणामकारकपणे पार पाडण्यासाठी पीएची सुविधा उपलब्ध करून दिली जाते. विधानमंडळ सदस्यांच्या वेतन आणि भत्ते संयुक्त समितीच्या शिफारशीनुसार पीएच्या मानधनात वाढ करण्याचा प्रस्ताव सरकारच्या विचाराधीन होता. त्यानुसार,मानधन वाढीचा निर्णय घेण्यात आला आहे.